الاثنين، 31 أغسطس 2009

غوتشي .. والأسبستوس .. والنانو .. وحمد المطر !

.
.
قبل قليل وبينما انا امزمز بشيشتي - ماركتها مو غوتشي :) - , فاجأني صديقي بخبر لم اتأكد من صحته بعد , يقول أنه تم اغلاق غوتشي فرع الفنار بالشمع الأحمر , لأنه كان يبيع شغلات تقليد ..! :)

كما قلت , انا لم أتأكد من صحة الخبر , لكن لو طلع صحيح , أنا أنصح زبائن غوتشي الدائمين انهم يتجمعون ويرفعون قضية مطالبين بالأضرار المعنوية والمادية الناتجة عن الحادثة , لأن كل الحريم الي كانوا يتكشخون على اقرانهم بشنط وجواتي غوتشي , سوف يكونون الآن في مرمى سهام الطنازه الي ما راح توقف , لهذا يجب المطالبه بتعويض معنوي :) .

وليس فقط من كانوا يشترون من غوتشي الفنار , لا كل غوتشي الآن مشكوك بأمره :) , يعني لا اشوف وحده\واحد كاشخ بشي عليه ماركة غوتشي , صدقوني اقزرها عليه حتى لو ما اعرفه :) .

هذا ونكرر ان الخبر لم يُتأكد من صحته بعد :) , والفال لـ إل في .. وبقية العصابة ..! :)
.
.
كنت قبل فترة أبحث في ويكيبيديا عن شغلة - نسيت شنو هي - , وأنتهيت إلى مقالة عن الإسبستوس. والجميل في ويكيبيديا أنك تبدأ ولا تنتهي أبدا , لأن كل مقالة تقرأها تجد فيها لنكات لمقالات أخرى , وهذا شيء يشجع على القراءة من ناحية , لكنه محبط أحيانا لأنك تحس بأنك تغرف من البحر بفنجال قهوة , وشيء ثاني دايما يحبطني , هو انني اكتشف ضعف لغتي الإنجليزية كلما تصفحت في ويكيبيديا , والله يجزاهم خير جماعة غوغل الي حاطين لنا مترجم .

المهم , بمقالة الأسبستوس , يتكلم الكاتب عن مادة الأسبستوس وهي مادة أصلها من السيلكا , وتمتلك صفات خارقة , من حيث القوة الميكانيكة ومقاومتها للحرارة وعزلها للصوت وخواص أخرى كثيرة جعلتها المادة المفضلة في البناء لفترة طويلة من القرن الماضي , حيث كانت تخلط مع الأسمنت , والأسبستوس يستخلص من مناجم خاصة , وأكبر انتاج عالمي حاليا ينتج من روسيا 40 % من الإنتاج العالمي , والصين تليها ثم دول اخرى .

حاليا يوجد الكثير من التحذيرات والمنع لإستخدام هذه المادة , خصوصا في البناء , لأنه قد تم التوصل إلى انها تسبب الكثير من الأمراض , خصوصا امراض الصدر وغيرها ..

الجميل في المقالة كان الناحية التاريخية لإستخدامات الأسبستوس , حيث ان الفارسيين القدماء كانوا يستخدمونه لصناعة الملابس , ولكنها لم تكن ملابس عادية - مو غوتشي يبيعكم خام عادي بمئات الدنانير !! - , لا هذي ملابس فيها صفة غريبة عجيبة :) , وهي انها اذا اتسخت لا يتم غسلها , بل حرقها , ولما يولعون فيها النار , تحترق مواد الأوساخ , لكن تبقى الملابس كما هي , لأن الأسبستوس مقاوم للإحتراق ولدرجات الحرارة العالية :) , فكان الفرس يسوون هالحركة لأي واحد يزورهم , والزوار متشققين من الوناسه حسبالهم سحر :) .

الحين بذمتكم مو هالملابس احسن من غوتشي ..؟ صج انها تسبب امراض وبلاوي , بس ما يحتاج غسيل , جمع ملابسك وقط عليهم زقارة وانت الي ماشي :)

وكان الفارسيون القدماء يؤمنون ان الأسبستوس ما هو الا صوف كائن خرافي قديم , كان يعيش في النار ويموت اذا لامسه الماء!
.
.
وللمهتمين بالإستثمار بالتكنلوجيا , انا انصح بالإستثمار بشركات النانو تكنلوجي , يعني اذا عندك خمسة آلاف دينار ما تبيهم , اشتر اسهم بشركة ابحاث او شركة منتجه للنانو تيوب او النانو تكنلوجي بشكل عام , وخلهم خمس سنوات او عشر سنوات , وانت ونصيبك , يا اما تصير مليونير , يا يصرفونهم يهال امريكا او اليابان وتظل انت تطق اصبع :) .

النانو تكنلوجي ليست تكنلوجيا جديدة على الصعيد البحثي , لأنها اكتشفت في الثمانينيات من القرن المنصرم , لكنها تنمو بشكل كبير من الناحية التطبيقية , ولها تطبيقات حيوية في مجال الطاقة , خصوصا النانو تيوب , لأنها تعتبر مخازن جيدة للطاقة الهيدروجينية , فإذا تم تطوير طريقة مثلى لإستخدامها كخزانات هيدروجينية , من الممكن ان تقضي هذه التكنلوجيا على الوقود الأحفوري في مجال السيارات إلى الأبد ..!

وبشكل عام - كوني مهتم بهذه التكنلوجيا - فقد لاحظت تركيزا كبيرا عليها في السنوات الثلاث الماضية , آخرها كانت مقالتين في مجلة كيميكال ويك العالمية الشهيرة - هذي مجلة موضة بس مو موضة ملابس لا موضة مواد كيميائية :) - , احدى هاتين المقالتين كانت تحمل محاذير من ان تكون مواد النانو هي الإسبستوس القادم !! , خصوصا ان لها خصائص شبيهة بالإسبتستوس من نواحي عديدة , لكنها تبقى مخاوف لم تثبت بعد .

وجامعة الكويت كالعادة سباقة في الأبحاث العلمية , لكنها تنتظر الوقت المناسب للإعلان عن نتائج ابحاثها في هذا المجال :) .

بالمناسبة أحد اكبر المهتمين - على القليل اهتمام بالقول ولا ادري عن الفعل - بهذا المجال في قسم الكيمياء بجامعة الكويت هو الدكتور حمد المطر - مرشح حدس في الإنتخابات الماضية في الدائرة الثانية :) - , وان شاء الله في الإنتخابات اليايه لو نزل بروح اسأله بمقره الإنتخابي , شنو سويت من ابحاث بالنانو تكنولوجي :) .
.
.
بس .. كتبت وايد :)

شكرا لإستماعكم .. :)

هناك 38 تعليقًا:

Mohammad Al-Yousifi يقول...

اول ما فتحوا غوتشي الفنار اذكر دشيت و كان فيه لبناني يشبه مهند واقف عند الباب

قام يطالعني من فوق لي تحت

زعلت و طلعت و دعيت عليهم

تسكيرة المحل حوبتي بأثر رجعي من 10 سنين

Yang يقول...

انا شريت عطر غوتشي من جمعية .... ؟

اخاف تقليد بعد ؟؟؟

ياني بتشمت بناس وايد شارين غوتشي يااااااااااااو

:)


تحياتي

غير معرف يقول...

اسمه حمد

مو

احمد

غير معرف يقول...

شل السالفة ؟!!

احتمال الفيلا مودا كله راح يتسكر بالشمع !!!


بس ليش


وحتن ماجد الصباح ليش تمت اقالته !


اقرى هذا الخبر اقالة ماجد الصباح

http://www.alqabas.com.kw/Article.aspx?id=527974&date=25082009

غير معرف يقول...

الخبر يقول

فيلا مودا: إقالة ماجد الصباح مع عدم إبراء ذمته

كتب عيسى عبدالسلام:
طبقت الجمعية العمومية العادية لشركة فيلا مودا لايف ستايل امس المادة 152 من قانون الشركات بناء على مقترح تقدم به معظم مساهمي الشركة، اذ تمت الموافقة على اقالة رئيس مجلس الادارة ماجد جابر حمود الصباح من منصبه، دون ابراء ذمته، وتعيين عبدالله بن سرقاد بدلا منه



.


.


.


احد يشرح لي شنو يعني ابراء ذمة ؟

Safeed يقول...

وجه الشبه بين اللحوم الفاسدة، و البضاعة التقليد هو (الشمع الأحمر) :)

الهوس الجماعي بالماركات بالكويت يغري أي باحث عن رزق سريع و مضمون .. شوف معارض الملابس و الاكسسوارات اللي يسوونها بالبيوت، ثلاث ارباعها شغل الصين و تايلاند من الدرجة الأولى، و البضاعة تخلص بيومين.. فاسحبوا البسطا من تحت ارجل المحلات .. فالظاهر قرروا انهم يجارونها :)
.
.
الاسبستوس استعمل لسنوات عديدة قبل أن تثبت آثاره الجانبية الضارة، و عموما الآثار الضارة بحاجة لملاحظة و مراقبة لمدة طويلة حتى تصل لدرجة الاثبات

لذلك الاستثمار في النانو حاليا مربح، إلى عشر سنوات قادمة لما تبدأ نتائج الأبحاث و الملاحظة الواقعية بالظهور :)

chandal/danchal!! يقول...

الله يكافينا شر غوتشي... الاسبستوس والنانو



في مادة محسنة لخصائص الكونكريت ينقال لها سيليكا فيوم... عسى بس مو اسبستوس؟... واحنا طايحينله آدميكستشرز منها!

غير معرف يقول...

مطقوق


غوتشي الفنار تم افتتاحه من 5 سنين

غير معرف يقول...
أزال أحد مشرفي المدونة هذا التعليق.
ayo0oh يقول...

مره كنا شاريه نفنوف من الاسطورة لما كنت اقايسه البياعه كانت تقولي
ياي شو بجنن هيدا ايطالي ومن الماركه الفلانيه وانا خو انهبلت وخذيته

بالبيت اطالع والا مكتوب عليه ميد ان فيتنام ورديته وعطوني فلوسي

وغوتشي ولا مره شريت منهم بس فندي وال في كذا مره الروح الصالحيه القاهم مسكرين بالشمع الأحمر

وبالنسبه لفيلا مودا شريت منهم جنطه قبل فترا ميو ميو لما فتحت السحاب اللي داخل والا مكتوب جاينا رحتلهم مع انها عندي شهرين قالولي نعطيج كابونات تاخذين ي شي بالمبلغ بأي وقت
قلتلهم ابي فلوسي انا ما اثق ببضاعتكم وردلي فلوسي

والي يبيع يقولي احنا نخلط البضاعه مع بعض وكلها اصلي بس المصنع يختلف >>>اي هين :)

من حري كتبت كل اللي عندي ..... تحياتي لك خيوو

غير معرف يقول...

مطقوق



hahhhaaaaaaa

لازم تسمع الطرف الثاني :)

bakah يقول...

مطقوق .. حياك الله :)

بس طالعك من فوق لي تحت زعلت ..!

انا تقريبا كل محل ادخله اللبنانيين يعاملوني كأني أطر من عندهم ..!! :)

ولا عمري زعلت .. بالعكس اتحرش فيهم واتطنز عليهم , بالعربي ابيهم بس يقولون لي انزح وراك علشان اعرف اتعامل معاهم ..!

bakah يقول...

يانغ .. حياك الله :)

من جمعيه .. وتسأل تقليد والا لأ ..! :)

وحياتك الشماته شغاله صارلها يومين :)

bakah يقول...

غير عرف -1 حياك الله :)

نعم .. اخطأت في اسمه .. :)

شكرا لتصحيح المعلومة

bakah يقول...

غير معرف -2 حياك الله ..:)

والله ما ادري ليش اقالوه !!

بس الشركة صارلها اكثر من ست اشهر موقفينها , والمساهمين تعبوا وحقهم يقيلونه ..!

اظن قصدهم بـ ابراء الذمة , هو ابراء الذمة المالية , بمعنى انه يمكن يساءلونه عن معاملات مالية معينة تمت بالشركة خلال فترة رئاسته ..

bakah يقول...

سفيد .. حياك الله :)

ما عرفلهم الا حسينوه بن عاقول , باعهم لحم كلب وخلا العالم تنابح :)

صدقت بموضوع المعارض المنزلية , صار جميع الشعب الكويتي تجار :)

النانو تكنلوجي انا متوقع تسوي ثروات مثل ثروات تكنلوجيا الكمبيوتر والإنترنت في القرن المنصرم ..

bakah يقول...

جاندل .. حياكم الله :)

ديروا بالكم ترى للحين في ناس بالعالم يستخدمون الإسبستوس , يمكن مغيرين اسمه ومسوقينه بالكويت !!

bakah يقول...

غير معرف -3 .. حياك الله :)

قاعدله الله يهديك .. :)

الريال صايم مشها له :)

bakah يقول...

اييوه .. حياكم الله :)

اغلبهم نصابين , ويبالغون بالسعر بشكل خيالي ..

اغلب محلات الماركات في الكويت تقوم بتحويل الرقم بالدولار إلى دينار ..

يعني مثلا يشترون شنطه بثلاثين دولار من ايطاليا , يعرضونها بالكويت بثلاثين دينار ..!!

حيل يبالغون بالأسعار ..!

bakah يقول...

غير معرف 3 .. حياك مرة اخرى :)

اخوي الراي الثاني محترم هنا , لكن ما نقبل التعدي على الآخرين , خصوصا انهم بضيافتنا ..

شكرا لك ..

الوتيــــــــــن يقول...

ماقول إلا : ياويلتي ويلتااااااااااااه

الحين طاح الفاس بالراس .. إنزين شنسوي؟ ياربي آنا شكيت بالموضوع بيني وبينكم مره كو جنطه من الجنط يبتها بس كانت ليذر من غوتشي واطرافها مع كثرة الكرف ذبت شوي .. مايه على بالي إني اتلطشت على قفاي ... فار دمي الحين شلون؟ قاصين علينا فيلا مودا وغوتشيوه وربعه؟ يعني انتحر ولا ألبس حزام ملغم وانط بنص فيلا مودا؟ واقول تبا لكم ... طرااخ

لا وكاشخه المشكله على رفيجتي لمن قالتلي يالظالمه جنط بهلسعر ييبه؟ آنا رايحه تايلند واييبلج طبجتها .. وأتفلسف عليها واضغطها ماتقدرين ومن هالحجي .. وين اودي ويها منها ياباكه وييييين؟ شكلي بقولها من كرمي عطيت جنطتي الماركه للسيلانيه علشان لي شمت خبر انها تقليد أقول لها : إي جذي ولا جذي الجنطه راحت لسيلان (تقزر؟)

لا صج عاد الحين شنسوي؟ إل في وطلع هم تقليد اللي بالصالحيه وطاحت البواكه والجنط بجبدي والحين قوتشي ومامر عليها 5 شهور .. شسوي؟ عندي الفواتير ارود اشتكي عند حماية المستهلك ولا ابلهم واشربهم فيمتو عالفطور؟

الوتيــــــــــن يقول...

تصدق آنا ذكيه زياده عن اللزوم .. مره وحده اجنبيه قالتلي فرقي بين الماركه والتقليد ان الماركه لا يمكن يسوون تنزيلات .. يعني لمن فيلا مودا الطيبه تسوي تنزيلات والشغله ام 300 اتصير اب 30 هل يعقل ان الدار الاصليه ترضى اتبيع بضاعتها الممتازة الصنع بهالسعر؟

وبعدين اكو ايميل ياني عن بضاعة فيلامودا انهم ايبون بضاعتهم من شركة يابانيه مادري صينية درجة اولى

ماقول إلا نفس ماقالت عايشة المرطه : يمه قلبي قلبي

طز بالرجالة يقول...

لهذا السبب الافضل انك ما تشتري شي غالي من الكويت بإستثناء الالماس و الذهب

الوتين
كلام الاجنبية فيه شي صحيح و شي غير صحيح. شانيل و لوي فيتون مثلا ما يسوون تنزيلات ابدا ابدا
لكن..في الدبارتمنت ستورز مثل ساكس و نيمن و بارنيز تحصلين تنزيلات على كل الماركات الموجودة..بس حتى الشانيل الي عندهم ما يصير عليه تنزيلات..الجواتي عزك الله اي بس الجناط انسي

فيه ماركات درجة ثانية و هي الماركات الامريكية كلها ينزل اسعارها و مرات بنسبة خيالية و انت و حظك

بس جد شتحبون في غوتشي؟ الله يزيد النعمة. كل وحده رازه اللوقو كبر راسها علبالها دشت نادي النخبة من شرت لها جنطة ب 500 دينار...تصدقو بنصهم و سافرو لبنان 3 ايام بالنص الثاني..عل الاكل تاكلون حلاوة جبن و يحوشكم شويه هوا

طز بالرجالة يقول...

على الاقل مو الاكل..عادي يوعانه

bakah يقول...

الوتين .. حياكم الله :)

لا يمكنني ان اقول انني اشعر بما تشعرون به لأن بعمري ما شريت شي من غوتشي :) ..

المفروض زبائن غوتشي الكويت يرفعون قضية يطالبون بتعويضات ..!

بخصوص التنزيلات , شيء طبيعي ان يصير تنزيلات نهاية السنة لتصفية البضاعة حتى لو بسعر رأس المال , ذلك ان الموضة عندما تتغير لا احد سيشتري البضاعة في السنة القادمة بنفس السعر ..

وبالنهاية اقول لكم , هاردلك :) , وديروا بالكم بالمرة القادمة :)

bakah يقول...

طز بالرجاله .. حياكم الله :)

صدقتي .. الذهب قيمته فيه , ما ادري بخصوص الألماس , لكن الذهب قيمته كل مالها تزيد ..

وهم صدقتي بموضوع السفر , على القليل الإنسان يروح عن نفسه كل هالغموم , والله احسن من شغلات مالها اي قيمة مادية ومعنوية سوى اوهام الموضة ..!

يعني انا افهم ان شخص يدفع مليون دينار لتحفة , او رسمة , لكن شغلات عملية مثل الجوتي او الجنطه تكرمون , هالشغلات تعدت قيمتها كأدوات وأصبحت غاية بحد ذاتها ..!

الوتيــــــــــن يقول...

إي والله صاجه يا اخيتي (طز بالرجاله) .. بس المسألة بمفهومي كانت إني عندي ولاء لحاجياتي بشكل عام.. وحبيت تكون هالجناط من ضمن هالتحف اللي اورثها لعيالي (مادري الاخت مورثه ذهب؟ ) ماعليه وايد أتأثر بالافلام العنجريزيه .. بس يعني احيانا تروحين المكان تلاقين هالجنطه لابقه على أكثر من لبس وحجمها حلو وملمسها حلو .. وهم اللبس والمظهر يعكس ثقة الانسان ولا جا بعد ماشرينا سياير كشخه والكل يارس وكورولا عدل؟

واخوي باكه والله مادري شقول لك . شكلي فعلا (هشحتهم) على اي احد لأني طاب خاطري منهم وعلى قولة اخيتي (طز بالرجاله) صار اللوجو بعيني موشي من عرفت السالفه :\

يسلمو .. وننتظر ماركه أخرى تطلع مضروبه :|""""

غير معرف يقول...

وييييييييييييه والله خفت

عاد انا شاريه من قوتشي الفنار :S

برووووح اجيك عليهم


والله حتى شكيت في ماركة بربري

:p

ياااسااتر


ياويلهم من الله :@ نصااااااااابين

كويــتي لايــعه كبــده يقول...

الناس تبي اللي يقص عليها وتفضله
ومو بس اللي فلوسهم زايدة
الا اللي ربيتهم ناقصة

على الطاري...

قرقيعانا أحلى من قرقيعانكم
تصميم وصنع في لبنان
وفيه قطعة فضة مشغولة من الهند
والكاكاو فاخر ماني قايل لك من وين علشان لحد يقلد
واليهال ممنوعين من لمسة او التواجد بنفس الغرفة
دايركت للأمهات ونحرص ان يكون امام الآخرين

مساكين انتو... فوتشي الفنار
الناس "هوت كوجور" من المصمم مباشرة مع ضمان "اكسكلوسيفيتي"

واااي
سج رائي تنكر

غير معرف يقول...

اووووخ

قوية !!


معقولة ماجد الصباح طردوه من شركته اللي اهو مأسسها !

Sn3a يقول...

بالنسبه لقوتشي
مادري ماجازفت وشريت من الديره شي احس حرام حتى لو 50 دينار ينقط على شي مو مضمون

لكن المحل اتسكر بسبب مشاكل بالرخصه
المشكله هني ماتدري هل التاجر وكيل ولا شاري اسم الماركه بس
فتروح بالمضمون وماتشتري احسن

وعاد العطورات شوف النصب
العطر نفسه تركيزة مختلف بستعش مكان
انا ما اتكلم عن العطر بانواعه سواء بيرفيوم ولا توايليت

البيرفيوم الجمعيه يتغير عن دبنهامز عن فيسز عن فافافوم

اضمن مكان تناغرا لحد الان


ثانكس عن المعلومات اللي قريتها بهالبوست اول مره ادري ان هالماده لها تاريخ انا عبالي ماده تنضاف للبنا وبس

وبالنسبه للنانو تكنلوجي
انا للاسف ماعندي معلومات وايد عنها لكن وايد اهتمو بهالتكنلوجي دكاتره الجامعه دخلوها بكل شي

حبيت مجله موضه الكيميستري خل اقوقلها واشوف

Fishah يقول...

انا عموما ماحب اروح غوتشي الفنار لاني ماحب اللي يشتغلون فيه .. وايد شايفين روحهم !

حسبي الله عليهم صار النصب في كل شي
وسالفة انهم يخلطون الاصلي مع التقليد
قالوها مره عن ال في بعد

عندي وحده بالدوام تتشيحط انها تلبس تقليد .. الحين عاد صج يكبر راسها بدون شي لوووول

bakah يقول...

الوتين .. حياكم الله :)

ان شاء الله ما يكون هناك اي ماركه ثانيه مضروبه :) ..

دمتم بخير ..

bakah يقول...

غير معرف .. حياكم الله :)

الله يعينكم على الصدمات :)

بربري هذي اول مرة اسمع عنها , ان شاء الله ما تكون مضروبه :)

bakah يقول...

كويتي لايعه كبده .. يالله حيه :)

شرهتك على الي سوى قرقيعان اصلا :)

بس عن الشبهه اشتريت كيس الصيداوي علشان اليهال ما يقولون ويص ويص :)

هوت كوجور هذا اول مرة اسمع عنه , شنو فرقه عن الهوت دوج ..؟ :)

bakah يقول...

غير معرف .. حياك الله :)

اي مسكين .. هذي احدى مساوىء الشركات المساهمة , المؤسس ماله اي قيمه اذا ما يملك نسبة الأغلبية ..

bakah يقول...

سنعه .. حياك الله :)

اي الإسبستوس لها تاريخ عريق :) ..

مجلة كيميكال ويك حيل حلوة وشاملة .. اقريها لا تطوفج

bakah يقول...

فشه .. حياكم الله :)

اتوقع حتى بدول اوروبا وامريكا اكو تقليد ونصب وايد .. واللي يشتري تقليد انا بصراحة احترمه حيل لأن واقعي :)