الأربعاء، 12 أغسطس 2009

عمال حجي غوتشي .. وإل في ..!

.
.
تستيقظ صباحا , تاخذ شاور - اذا تحب النظافة - , أو ما تاخذ شاور , تغسل ويهك , أو ما تغسل ويهك , تلبسك ملابسك , غصبن عنك , وتشغل السيارة , ممكن تتريق بالبيت او بالمطعم الهندي , او حتى تتهور وتعلن تمردك على الطعام وما تتريق , المهم انك توصل للدوام بالوقت علشان ما يخصمون عليك ..!

تقعد بالدوام , تقرق على ربعك , كلكم جذابين , لكن الجذب مستويات , وتمضي الساعات :) . تخلص دوامك , لابتوبك تحت ابطك , الي يشوفك يحسبك خبير كمبيوتر , وما يدري انك مشتري الجهاز علشان تلعب كوت بوسته , مع شباب الإدارة الي يمكم. تحط لابتوبك بسيارتك وتروح بيتكم , ماكو ماجله , مو مشكلة ! , ماكو غدا , هم مو مشكلة ! , العيال حفاي ويلعبون بالشارع , احنا شكو !!

كل يوم على هالحالة , لين ايي يوم 27 الشهر لبعض الناس , او 23 الشهر للبعض الآخر , وتكشخ أم العيال , بثوبها الي اشترته الشهر الي طاف , وما لبسته الا مرة وحده , وهذي المرة الثانية. وتبدأ الحفلة ...
حبيبي .. ام العيال خلفك وتعلو وجهها إبتسامة شقاقيه يعني مستحيه ..!
هلا يا عمري .. ويبدأ بطنك يعورك , وتحس بشوية خدار بريولك ..!!
آنا أحبك .. وإبتسامة ساحرة .. ثم دحرجة على الرأس .. وتصير أم العيال قبالك ..!
ابتسامة باردة منك .. وتبدأ مصارينك تهوس .. وريولك مو شايلتك .. وفجأة تشعر برغبة بالبكاء ..!
آمري يا عمري .. محتاجة شي .. ثم ترفع حاجبيك ..؟!!
اكو جنطه .. !!
هني انت تبدا تسب في قلبك .. لكن ما زال في أمل ان هالأمسية تعدي على خير لذلك تبتسم ..!
وين ..؟ تتسائل بحسرة ..!
بالصالحية ..! بغنج ودلال ..! :)
هني انت تدخل بحالة من البكاء المتواصل .. وتبدا تسب بالياباني على شوية روسي ..!
.
.
.
إختربت الأمسية .. لكن العم غوتشي سيحصل على نصيبه من المعاش ..!

وتستمر حياة عمال الحجي غوتشي , وإل في , وااا .. بس هالماركتين الي حافظهم :)

عمال الحجي غوتشي غير عن كل العمال .. لأنهم ما يستلمون معاش منه , بل يعطونه معاش ..!

وبالكويت في وايد عمال عند العم غوتشي ..

في ناس تشتري جنطه بـ 200 دينار .. وفي ناس تدفع إيجار شقة كاملة بـ 200 دينار .. وفي ناس معاشهم كله على بعضه 200 دينار ..!

وكل هؤلاء عايشين .. لا ويمكن ابو معاش 200 مستانس اكثر بحياته ..!
..
هذي القصة مستوحاة من حادثة حقيقية .. :)

وكل عام وانتم بخير .. وتستاهل ام العيال .. ويستاهل حجي غوتشي :)

هناك 30 تعليقًا:

سيدة التنبيب يقول...

أنا أسميه هوس جوتشي و إل في..

الحريم و فهمناها.. الرياييل يلبسون قمصان بيريبيري بعد ؟

ma6goog يقول...

الله ستر

خلال السفرة الماضية كنت راح ارتكب جريمة بشراء جنطة سعرها 6000 دينار للمدام

أخطأت صفرين

مركبنا يقول...

معوضين ان شاء الله \

ياخوي الميزة الوحيدة الازمة الاقتصادية ان كل محلات الماركات مسويه خصم طول السنه (=

ولا شنل او ديور يخصمون !

اهل الملايين قلت ملايينهم وقاموا يخصمون واحنا الفقاره لى الحين نشتري (=

شيزون يقول...

مطعم باكه


انت طلعت متزوج ؟!

غير معرف يقول...

الكويت تتعاقد مع فرنسا لبناء مفاعلات نووية بالكويت.
---------------------------------------

الكويت ضحية عملية نصب عالمية!


الطاقة النووية السلمية أصبح موضوع قديم عفى عليه الزمن ومحفوف بالمخاطرومعظم الدول المتقدمة بدأت تستعمل بدائل أخرى سلمية للطاقة أقل تكلفة وأقل خطرا وتحقق نفس النتائج .. فلماذا لانبدأ من حيث انتهى الأخرون؟ لماذا نشترى دائما التكنولوجيا القديمة سواء فى المجال العسكرى أو السلمى؟

الكويت يستطيعون تغطية كل احتياجاتهم الكهربائيه وكذلك تحلية مياه البحر من الطاقة الشمسية و طاقةالرياح.

هناك 4 مقالات هامة عن هذا الموضوع و هى النووى كمان و كمان ـ كارت أحمر ـ كارت أخضر ـ الأشعة الذهبية.‏

ارجو من كل من يقراء هذا ان يزور ( مقالات ثقافة الهزيمة) فى هذا الرابط:

www.ouregypt.us

chandal/danchal!! يقول...

تستاهل ام العيال

وتبا لغوتشي وزبانيته وللزل الايراني اللي شاب ضو


:p

غير معرف يقول...

كم عمرك ؟

Miss-Q8 يقول...

الله يرفع عنك و لا يبلانا p;

حَافِـيَةُ الَقَدمَيّـنْ ولِبَاسِي المَطـرْ يقول...

فسسق
ناس ما عندها تاكل
وناس بس زاهبه حق المهايط :/
الله يبعدنا عنهم بس

غير معرف يقول...

I don't blame you for crying

This useless quest after equally useless commodities - by women - is one of the only things I do not understand, nor support

Exterminate all stores; they're evil

Sweet Revenge يقول...

تستاهل ام العيال ومعوض ان شاء الله
:)

حلم جميل بوطن أفضل يقول...

درر

مطعم باكه يقول...

سيدة التنبيب .. حياك الله :)

هوس .. خبال .. المهم انه اكو ناس تربح ملايين بسبب هالشغلة ..!

الرياييل اصابتهم العدوى :)

مطعم باكه يقول...

مطقوق .. حياك الله :)

6000 .. حط فوقهم فلوس جوتي ونظاره تشتري شقه صغيرة بلبنان :)

مطعم باكه يقول...

مركبنا .. حياك الله :)

القصة مو عني .. لو انا الي دافع ميتين ثمن جنطه او جوتي .. صدقيني اصكر البلوق سنة .. او احوله بقاله علشان اعوض الخساير :)

اي الأزمة العالمية اعادت لبعض الناس عقولهم :)

لكنها ما كانت كافيه ..!

مطعم باكه يقول...

شيزون .. حياك الله :)

القصة مو عني انا .. عن واحد من الربع :)

مطعم باكه يقول...

غير معرف .. حياك الله :)

شكرا لتذكيري للمرة الثالثة :)

مطعم باكه يقول...

جاندل .. حياك الله :)

مو ام عيالي .. بعد ما صار عندي ام عيال .. ام عيال واحد من الربع مغلوب على امره :)

الزل الإيراني مثل الذهب .. سعره فيه :) ..

ويستاهل الفلوس .. لأنه مشغول بأيدي ماهرة .. اما جناط حجي غوتشي كلها خرطي بخرطي :) .. ماادري شعاجبكم فيها .. :)

مطعم باكه يقول...

غير معرف .. حياك الله :)

والله اكثر تعليق حيرني .. :)

لازم تعرف ..؟ :)

دزلي ايميل واقولك .. :)

مطعم باكه يقول...

miss-q8 حياك الله :)

الله مو باليني .. :)

واسأله أن لا يبليني .. :)

مطعم باكه يقول...

حافية القدمين .. حياك الله :)

شوفي انا نظرتي تختلف ..

الي عنده ويبي يكشخ انا ما الومه , صج انها فلوس حرام تروح لهالنصابين :)

المشكلة باللي ما عنده فلوس , ويبي يصير مثل الي عندهم , ويتسلف ويصرف بخبال , بس علشان يعوض عقدة النقص !!

دمتم بخير ..

مطعم باكه يقول...

غير معرف .. حياك الله :)

عز الله انك صادق .. :)

صج والله كلهم شياطين ..

انا فكرت اعمل لي ماركة خاصة فيني , وانصب على هالحريم , لكن بعدين ضميري أنبني . . :)

مطعم باكه يقول...

سويت ريفنج .. حياك الله :)

كما قلت في التعقيبات السابقة , مو انا الي بالقصة :)

القصة عن واحد مقرود اخذ له مقروده , وعيالهم حتما يطلعون مقاريد , وهذي حال وايد ناس بالكويت للأسف :)

مطعم باكه يقول...

الحلم الجميل .. حياك الله :)

اشكرك عزيزي .. :)

Sn3a يقول...

يستاهلون جناط ليش لا
بس مو كل شهر عاد
اذا تكرر الشي تقل قيمته

كويــتي لايــعه كبــده يقول...

التسويق مصيبة

جنطة كانت جلد تمساح والا جلد بني آدم شاللي يوصل سعرها الاسعار اللي وصلت اليه؟! والمصيبة الأكبر ليش الحريم قابلينها كأنها أمر طبيعي ما فيه شيء؟
أم التبذير ولا قينهم وحنا وياهم مقصة وداقين على وتر "الكشخة" الوهمية اللي نصها مو حلو اساسا.


طبعا حتى أنا أتكلم عن واحد من الربع
:)

Eng_Q8 يقول...

بما اني مو متزوج بس اجزم ان جوابي راح يكون وين معاشج

مطعم باكه يقول...

سنعه .. حياك الله :)

احيانا تكون القيمه للشيء ذاته , مثل فستان جميل جدا ومطرز ومتعوب عليه .. هذا ربما يستحق ان يصرف عليه الإنسان قدرا من المال ..

لكن احيانا بعض الماركات ياخذون فانيله داخيه ويحطون عليها اسم الماركه , مثل نايكي, وفجأة تصير قيمة الفانيله 10 دنانير بعدما كانت دينار واحد ..!

مطعم باكه يقول...

كويتي لايعه كبده .. حياك الله :)

لووووووووووووووووووول ..

اي كلنا نتكلم عن واحد من الربع :)

التسويق دهاء .. منظومة كاملة من الدعايات والأفلام والراديو والصحف والمجلات .. كلها خلقت لتغير عقلية الزبائن المحتملين ..!!

عالم التسويق غريب عجيب ..!

يلعبون على وتر الثقافة الجمعية , بمعنى انك تفرض منتجك كقيمة مادية قائمة , بينما هو بالواقع شيء تخيلي لا علاقة له بالواقع ..!

مطعم باكه يقول...

مهندسنا .. حياك الله .. :)

صدقني ما راح تقدر تقول هالشي دايما .. الزواج علاقة عرض وطلب ههههههههههههههههههه ..