الثلاثاء، 20 يناير 2009

تكرم المره .. والمرأه والهندي ..!

.
أمس بالليل اتصل فيني واحد من الشباب , تروح الشيشة ؟ , قلت له اوكي مرني , مرني الولد , طول الطريق يقط نغزات , عن الحريم , الولد توه متزوج , وشكله متهاوش مع زوجته ويبيني اسأله شصاير :) ..

انا طبعي ما احب اتدخل بهالمشاكل , وثاني شغلة منعتني ان هالصديق يحترم كلمتي وايد , فأخاف اقوله ارجع كفخها يروح يكفخها صج :) , لكنه قال جملة غريبة ضحكت عليها , قال : والله يا فلان , الحريم مثل الهنود , لازم تعاملهم بإحتقار وتطنشهم وما تعطيهم ويه , وبعدها يصيرون خوش ناس , وبينما هو يقول جملته الرائعة هذه اتصلت فيه زوجته :) , لكنها لم تعتذر , سولفت شويه شلونك شخبارك , متعشي مو متعشي , بعدين صكرت جنه مو صاير شي هههههههههههههه ..!

بصراحة انا بالبداية ما صدقت جملته , لكن ان يأتي الإثبات بعد دقيقة من جملته الشهيرة , خلاني اشك :) , شرايكم انتم ؟ انا عن نفسي لا املك جوابا لأني مو مجرب اتعامل مع الحريم , الهنود اعرف اتعامل معاهم ومو كلهم يحتاجون هالمعاملة :) ..

..

مرة واحد ثاني من الربع , كان يسولف سالفة , فبنص السالفة طرى مرته , وبعد ما قال المره , قال كلمة في غير محلها :) الجملة كانت كالتالي :

بلا بلا بلا , المره , تكرم , بلا بلا بلا ... ( بلا بلا بلا يعني سوالف ترى :) ) ..

وقفته , قلت له يا فلان , شنو قلت ..؟

فقال : بلا بلا بلا , المره , تكرم , بلا بلا بلا ..!!

شكو تكرم يا ابو الشباب ..؟

جان يقول احنا نكرم الرجال لما نطري المره , فنقول تكرم ..!

يعني مثل لما الواحد يقول : انا رايح للحمام , تكرم ..

او لما يقول : حمار , يكرم السامع ..

جذي ..!!

صراحة استغربت , ولما تابعت الموضوع وسألت , لقيت ان قبائل جنوبية وشمالية تشترك بهذه الكلمة , يعني مو قبيلة بذاتها , لكن مو كل القبائل تقول هالكلمة ..!

غريب كيف ينظر هؤلاء للمرأة على انها شيء بهذا النقص .. او ربما بأنها رجس ..!!

...

ونختمها بقول الشاعر العظيم :
إن النساء رياحين خلقن لكم ... وكلكم يشتهي شم الرياحين .

فأجابه شاعر أعلى قدما وأجزل شعرا منه بالقول :

إن النساء شياطين خلقن لنا ... نعوذ بالله من شر الشياطين :)

هناك 23 تعليقًا:

حلم جميل بوطن أفضل يقول...

ويح ريحانة قلبي ... حليما

Salah يقول...

تبي نصيحة!

غير ربعك أحسن لك!

يعني عنصرية جذيه مو شي!

:)

ma6goog يقول...

i second salah

Safeed يقول...

هي فكرة موروثة من قديم الزمان ، و مرت عليّ وايد :)
هذا الشيء يوضح بشكل كبير أنهم " استسلموا " للإسلام ، و لم يسلموا لذلك بقيت كثير من افكارهم المضادة له موجودة في نفوسهم :)

مطعم باكه يقول...

الحلم الجميل ..

:) ..

شكلك متولع ..

عاد حليمة ..!

لكن كما يقولون .. وللناس فيما يعشقون مذاهب ..! :)

مطعم باكه يقول...

صلاح .. حياك الله ..

:) ..

أغيرهم شلون بالله ..؟! :)

هم صج فيهم تحيز نوعا ما , لكنه ناتج عن سوء فهم اكثر منه عنصرية .. :)

يعني مو مثل رأي مولانا أرسطو بالمرأة , الي يقول أن المرأة رجل ناقص , :) ..

لا هم يشوفون انها كيان كامل , لكن مختلف وله خصائصه .. :)

مطعم باكه يقول...

ابوسلمى .. حياك الله ..

حاضر , باجر ادق عليهم اقولهم طلقتكم بالثلاثة .. :)

هي وقفت على رأيهم بالنساء .. :)

خلها مستورة .. :)

مطعم باكه يقول...

سفيد .. حياك الله ..

ليس بعيد عنك الروايات القائلة بخلق المرأة من ضلع أعوج , او من ضلع آدم , يعني حتى بالفكر الديني الملوث بالإسرائيليات , يوجد هذه النظرة ..

عمت مساءا :) ..

سيدة التنبيب يقول...

أنا مع صلاح و مطقوق :)

انونيمس بالعربي يقول...

هههههههههه مساء الخير

هذه شخصيات منفردة واطباع شخصية ماينفع نصبغ نص البشرية فيها
.
.
اما بالنسبة لبيتين القصيد في الاخير
انا اقول لا خلقنا رياحين ولا خلقنا شياطين
خلقنا اوادم لنعبد ونعمر بالارض مثل مايقول درس الدين بالابتدائي والمتوسط والثانوي
p;

مدري ليش الرجل يعتبر نفسه هو محور هالكون والمراة خلقت لتلطف عليه عيشته.. ياحافظ!!! ماشوف المراة تقول هالكلام، ياريت اصحاب هالبيتين يتعلمون من المراة التواضع شوي .. عسى ماوافتهم المنية بس؟
p;

مركبنا يقول...

تكرم مرة وحدة

يبا خذها مني لي يتعنتر جدام الناس على مرته اهو الي دايسته مرته
ومخسبقته

Safeed يقول...

خل بقايا الإسرائيليات لمن يؤمن فيها .. و رواية الضلع ساقطة عندنا .. و لكن قد توضح سبب وجود هذه الفكرة عند هؤلاء الأشخاص و هي أنها امتداد لأفكار جاهلية حاولوا الباسها لباس الاسلام :)
شكلك ما قرات " نظام حقوق المراة في الإسلام " للشهيد مطهري .. أما انا ادعي اذا بتزوج ، بتزوج وحده ما قرات هالكتاب للحين :)

ZooZ "3grbgr" يقول...

وي زين ما طاحوا بلساني

جان بجيت هههههه

من صجهم يقولون تكرم!؟!

غريبه والله

يكفي انهم ما يذكرونها جدامنا

بس صدقني

اللي يتكلم جذي عن المراه

فعنده خلل بحياته بتعامله نساء بيته

وتربى على اهانتهم

يعني اكو احد يقول عن امه تكرم!!

:/

غير معرف يقول...

الحريم مثل الهنود , لازم تعاملهم بإحتقار وتطنشهم وما تعطيهم ويه , وبعدها يصيرون خوش ناس
____________
في ناس تفكر جذي؟؟؟ الصراحة ما ابي اغلط علي صاحبك بس الانثي كائن لطيف تهتم بالي يهتم فيها ,طريقته هذي مع زوجته لها عواقب صدقني عليه مو عليك طبعا ;)

__________________________________________





, وبينما هو يقول جملته الرائعة هذه اتصلت فيه زوجته :) , لكنها لم تعتذر , سولفت شويه شلونك شخبارك , متعشي مو متعشي , بعدين صكرت جنه مو صاير شي هههههههههههههه ..!

بصراحة انا بالبداية ما صدقت جملته , لكن ان يأتي الإثبات بعد دقيقة من جملته الشهيرة , خلاني اشك :)

________
اي اثبات الله يهداك ,زوجته ما اعتذرت ودقت عادي يمكن مو متهاوشين مجرد اختلاف وجهات نظر بس صاحبك يبالغ ويبي يتشيحط جدامك .
شكلها مشيته مسطره لوووووووووول

مطعم باكه يقول...

سيدة التنبيب .. حياك الله :)

والله الصديق الوفي هذه الأيام ما يتحصل , الناس تدوره بالتفق ..! :)

وهذي وجهة نظرهم , نختلف معها لكن نستمع لها .. :)

خصوصا ان ما فيها عنف جسدي ضد النساء ..! :)

مطعم باكه يقول...

أنونوميس بالعربي .. حياك الله :)

نعم صدقت , هي حالات لا يمكن تعميمها .. ربما لو شكلت ظاهرة لأمكن التعميم :)

وعلى راسي درس الدين , خصوصا جزئية لنعمر بالأرض .. :)

ربما ينظر الرجل بهذه النظرة بسبب نزواته وشهواته , لكن ألا ترين أن كثير من النساء يشجعن هذه النظرة ويقوينها ..

خلينا ما نروح بعيد , المدونات ..

مري على المدونات الكويتية , ماني قايل مدونات نساء العالم كله , وشوفي جم وحده تستخدم صفة من صفاتها الجسدية في استخدام معرفها ..

كويتية أمورة , كويتية حلوة وبكيفي , كويتيه والخدود جنهم قيمر عراقي .. :)

ومن هالمسميات , يعني بذمتكم شنو راح يكون نظرة الرجل لفتاة تقول انا حلوة ودلوعة , أكيد سيفكر بها من ناحية جسدية لأنها حصرت نفسها بهذا المسمى في هذه الخانة ..

طبعا انا لا اقول ان هذا متعمد منها , حاشى لله ان نتهم بنات الناس , لكن هي كلها افعالنا نعملها ولا نعي الكثير منها , وقد يكون للعقل الباطن دور في ذلك ..

على العموم انا كتبت بوست صغير هني , لعلي اتطرق لهذا في بوست قادم , على امل ان لا نفهم خطأ وتهجم علينا الجمعية النسائية الثقافية .. :)

شكرا لمروركم اختي انونوميس .. !

مطعم باكه يقول...

مركبنا .. حياكم الله اخي ..

والله هذا الكلام فيه الكثير من الصحة ..

ينقلي صديق مشترك لصديقنا ابو تكرم , يقول انه شايفه بالسوق شايل الكياس ويمشي خلف المره مطأطئ الرأس :) ..!

والله اعلم .. ههههههههههههه

هي الظاهر لفظة عفوية غير مقصودة ..

مطعم باكه يقول...

سفيد .. حياك الله عزيزي ..

لا والله لم اقرأ الكتاب , قرأت له كتاب فلسفة الأخلاق , كان جدا ممتع ..

نعم , الله يوفقك حبيبي ونحضر عرسك .. :)

لكن عزيزي انت بهذا تستغل جهل المسكينة بحقوقها :) , ماكو إشكال شرعي بالموضوع :) ..!

مطعم باكه يقول...

زووز .. حياكم الله اختي ..

لا طبعا ما يقول عن امه تكرم ..!

اكو عالم علماني ينتقد الإسلاميين يقول , ان المرأة تكون في بداية حياتها رجسا , وفي نهاية حياتها يكون تحت اقدامها الجنة ..!

طبعا هذا الإشكال نحيله لحبيبنا سفيد يرد على هذا العالم ههههههههههههههههههههههههه ..

سفيد ادري والله معذبك تعلق عشر مرات بالبوست الواحد .. :)

مطعم باكه يقول...

غير معرف .. حياك الله اخي .. :)

يمعود اخذ راحتك , تبي تغلط عليه , حتى لو تبي اعطيك رقمة تدق عليه تسفل فيه :) ..

نعم , هي الحياة الزوجية تجارب , يمكن لو زوجته خضعت لهذه المعاملة الخاطئة ستترسخ هذه القناعة بدماغ المدهول على عين امه ويصدق نفسه ويقوم مرة يبي يطقها تكفخه كف وتكسر احترامه لنفسه ههههههههههههههه .. وتصير نهاية رجل شجاع .. :)

والله يمكن , ممشيته على السراط بعد .. :)

الله يستر علينا وعليه , للأسف ان الوعي مفقود في كثير من الزواجات , تصور انني قرأت مرة ان نسبة الطلاق للزواج في السنة الواحدة تعادل 50%

يعني من كل اثنين يتزوجون , واحد يطلق ..!

وهذي ظاهرة خطيرة للأسف موجودة بمجتمعنا , كله بسبب القناعات الخاطئة ..!!

يعني ياهل تزوج له ياهل , عصب , صكها كف , قالتله طلقني , طلقها , واهي عندها ياهل , يضيع مستقبل هالياهل المسكين ..!

انزين طقج كف , روحي لبيت اهلج , كلمي اخوانج , يروحون ينامون بمردانه بالشقه , وبعد شهرين يرجع لج , وتروحون شهر عسل ثاني , وسمنة يا عسل اشطه يا مربه .. وليف هابلي إيفر آفتر .. :)

مشكلة والله هاليهال .. :)

Yang يقول...

عادي, ناس وايد عندهم هالمنطق.

اللي يقول تكرم المره, وغيره تكرم الهندي, وغيره وغيره ...

هذي الحرية طال عمرك :)
وكل هذا بسبت مجلس الأمة والوزراء.

:)

مطعم باكه يقول...

حياك الله اخي الكريم يانغ .. :)

اي والله .. كله بسبت المجلس , ترى الحكومة مالها دخل .. :)

superior يقول...

langhao95
shihou67
aoxiang57
lingyuan59
piakqiu67