الاثنين، 23 مارس 2009

الدويسان .. بُعيد الفاصل ..! :)

الشعب الكويتي شعب شمات لدرجة الإغراق احيانا , بحيث تجري الطنازه في عروقهم , والكويتي يتندر حتى في مواقف لا يجوز فيها التندر , مثال :
يقولون عبدالحسين عبدالرضا حاضر دفان واحد من الممثلين الشيعة , فلما قام الملقن بتلقين الميت – حسب الشعائر الشيعية يقوم شخص بترديد كلمات مخاطبا الميت إيمانا منهم انه يسمعهم في هذه المرحلة - , قال الملقن : اسمع وافهم يا فلان ..!
فقال عبدالحسين : اهو واهو حي ما يفهم تبيه يفهم الحين ..!! :)
..
قبل قليل وانا اقرأ في جريدة أوان , كان هناك خبر عن ترشح المذيع الدويسان , خبر عادي , والناس تعقب , واحد يمدح , واحد يذم , لكن تعقيب واحد خلاني افصل من الضحك , يمكن يكون تعليق سخيف عند البعض :) , لكن والله موتني ضحك , يقول :
الدويسان مرشح نفسه , بس مو الحين , بُعيد الفاصل لوووووووووووووووووووووووول ..!!
· بُعيد الفاصل , جملة اشتهر فيها الدويسان , واظن قلده داود حسين فيها :)
..
وبنفس جريدة اوان , قريت خبر سمعت عنه اشاعة قوية من زمان .. :)
يقولون بيجنسون كيتا حبيب القدساوية .. :)
صراحة اختيار موفق .. صج انها سياسة طايح حظها , لكن اذا بيجنسون , خل يجنسونه اهو :) ..
..
كنت فترة طويلة متحير من الكثير من الشباب والبنات الي اشوفهم بطريقي للدوام صباحا , فأنا اصل لدوامي الساعه 7.30 صباحا , وطوال الطريق تصادفني الكثير من السيارات , وفيها اشخاص يتحدثون بالنقال ..؟!!
والله ودي اعرف يكلمون منو ؟؟
الساعه سبع ونص يا بشر , يعني تكلم الأهل بالبيت ؟ توك طالع منهم ؟!!
تكلم الصاحبة ؟
شنو هالمزاج على الصبح , بعدها مو متريقة البنت ..؟!
أنا اظن والله ان الكثير منا يخافون من لحظة صفاء ذهني واحده , حتى لا يفكروا فيها , لأنهم اذا فكروا سوف يتألمون بسبب ما تقودهم إليه أفكارهم ..!!
لهذا كان الهاتف النقال والأغاني طوال الطريق وبصوت صاخب وغيرها من الملهيات في الحياة , حتى لا نضطر للتفكير ونتحمل نتائجه المؤلمه ..؟!!
الله اعلم ..!
..
هل لاحظتم على انفسكم انكم بدأتم بالتقشف بعد الأزمة العالمية ..؟ :)
انا صراحة لا اراديا بدأت بالتقشف , رغم ان الراتب هو الراتب ولله الحمد والمنة , لكن توجه لا إرادي قادني لسوق السالمية القديم بدل الأفنيوز حين قررت شراء بناطيل جديدة للعمل ..!!؟
واكتشفت اني كنت قبل ست اشهر قد اشتريت جينز واحد بقيمة الخمس بنطلونات الي اشتريتهم هذا الشهر ..!!
لهذا انصحكم جميعا بمقاطعة الأفنيوز , انا مرة وحده شريت منه , وكانت لحظة ضعف اغوتني فيها شياطين الرأسمالية على ترك مبادئي الإشتراكية والشيوعية :) , وصرفت بيوم واحد وبمحل ملابس واحد ما قيمته 115 دينار عدا ونقدا ..!
والله شياطين الرأس ماليين , تصدقون اشتريت وما حسيت بالذنب , العادة انا لما اشتري اي شي لازم تمر امامي مجاعات افريقيا والناس الي قاطعها الجوع بالهند وغيرهم , صج اشتري بالنهاية , لكن هم ضميري يؤنبني شلونا حنا عايشين هالعيشة الرغيدة بينما اخواننا بالإنسانية ماكلين تبن تكرمون ..!
لكن بالأفنيوز , كأنه سحر , تدخل المحل , تشوف قمصان لو تلاقيها بره ما تدفع فيها فلس , تشتريها بعشرين دينار حق القميص الواحد ..!! , وتطلع ولا جنه شي صار ..!!
شياطين الرأسمالية تلعب لعبتها في مخوخكم .. انا خلاص قاطعت الأفنيوز .. :)

هناك 36 تعليقًا:

chandal/danchal!! يقول...

اسمحلي اعلق!

لووووووووووول + استغفرالله العظيم
@ حسين عبدالرضا!!! هالريال يفررخ نكت!!! شهالدم!!!! ما يسوون منه استنساخ!!!


ثاني شي على سالفة مكالمات الصباح!!

لازم اصبح عل والدة واتحرش فيها من الصبح وأسألها شنو غداكم اليوم!! جنه مو لي... عشان ما تنساني بالنقصة!! وانسب وقت... الصبابيح بطريجي حق الدوام!

موضوع التقشف ليلحينه ما وصل وشكله ما راح يوصل... وللأمانة!! ولا يطرون على بالي مجاعة افريقيا... لا بالخير ولا بالشر!! مو معقولة بعد نهللق بروحنا عشان مصائب ناس تفصلنا عنهم قارات واديان وثقافات وساعات ساعات كما تقول صبوحة الشحرورة!

من باب الانسانية الواحد يتعاطف معاهم!! بس مو بهاللون يالشيخ!!

ودرجة التأثر تختلف بين واحد وواحد!! حسب نوعية الجلد... في يلد تمساح وفي يلد بيبي!

طولتها وهي قصيرة

سعيدة بالبوست! حتى اسمه فنتق!

طز بالرجالة يقول...
أزال المؤلف هذا التعليق.
طز بالرجالة يقول...

سالفة عبدالحسين من زمان سامعتها
علبالي مو معروفه الحين اكتشفت انها نكته و قمت اشك انها صج مدام انتشرت جذيه

سالفة دويسان...صج يضحك التعليق
مزاج الي كاتبه

الافنيوز
اذا ما تشتري منه تطلع مو كويتي
مو اصيل
مو من بطنها
مو من مواخيذنا

لازم تصرف و تصرف و تصرف
بدون مخ
بدون تفكير او حساب للمستقبل
علشان تصير كويتي

ولا هااا ترى نبتلش فيك و تعاد رقع عاد
ما وراك ظهر ولا عندك قدم ذهبية مثل اللاعب المذكور.. من يجنسك مره ثانية؟

و تحياتي للصعاليك

Safeed يقول...

النكتة هي احدى وسائل تلطيف الواقع ، شدة الضغوط اليومية او المواقف المؤلمة اللي يمر فيها الإنسان تجبره على خلق النكتة من اللاشيء بس عشان يخفف صدمة هالواقع عليه.
مرات في مواقف محرجة تيي نوبات ضحك فجائية "يجاهد" الانسان عشان ما تطلع رغم انها في الغالب تكون بسبب تافه او لا يستحق الضحك لما نعيد شريط الذكريات مرة ثانية.
لكن هل الكويتيين شعب "مضغوط"؟
سؤال محيّـر :)
جوابه بُعيـد الفاصل :)

....

و يقولون مو نادي حكومة :)
اخيييه عليك يا بوحمزة .

.....

اللي يتكلم بالتليفون ما يختلف عن اللي يراقب الأوادم :) كل واحد فيهم يقضي وقته بطريقة ما.
شلون لك خلق تجابل الاوادم من الصبح و بهالزحمة ؟
.
أنا اعتقد أن هناك شيء يجذب الكويتيين إلى التليفون ، حبهم للحديث و الحش و السوالف يفوق الوصف .
في أي ساعة و بأي وقت .. عشق لا متناهي للتليفون!
هذي ملاحظها بحكم إن الكاره للشيء يلاحظه :) و على طاري التليفون ذكرتني ادور تليفوني ما ادري وين قاطه من الظهر :)

....

يوم الثلاثاء اللي طاف رحت المباركية مع احد اصدقائي ، شبهت على وحدة لما تأكدت منها رحت سلمت عليها كانت خالة المرحوم ، أول ما شافتني قالت : هذا إنت؟
و انا أقول منو هذا .. جنه إيراني قاعد يخزني !!

لذلك أنا صرت قاب قوسين او أدنى من اني اقرر الاكتفاء بالدشداشة بعد اليوم بسبب ان وين ما اروح يحسبوني ايراني بسبب البنطرونات و القمصان!
بالعراق / بسوريا / بتركيا ... إلخ :(

Mohammad Al-Yousifi يقول...

اي دايرة؟

بصوتله

حاطب ليل يقول...

تصحيح
جريدة الان مو اوان :)
..
بو عدنان يسويها
:)
...
بخصوص الكويتيين و "النكته"
ياخي احس طفنا المصاروه
..
مسالة التقشف انا مبلش شد الحزام صارلي وقت ..بس مو مسالة
"جعاصه" :)
لا
مسالة مالي خلق
والله مرات التبذير يونس ويفرفش

غير معرف يقول...

مسائك ..
صباحك .. فل وياسمين

على طاري بو عدنان الله يعطيه العافيه تذكرت موقف حصل مع عمي لما كان في لندن يركب بطاريه حق القلب وكان بو عدنان متواجد في لندن لنفس السبب ودار نقاش بينهم وبعدها بو عدنان سأل عمي قاله الا انت ما قلت لي شتسوي هني بلندن قال عمي جاي اركب بطاريه للقلب ؟!
ضحك بو عدنان وقال يييه علامنا احنا يا الكويتيين قلبنا روادو تالي عمرنا ( راديو لغير الناطقين بالعربيه )

على قولة الاخت جندل هالريال يفرخ نكت


الا على الطاري بغيت أسألك أنت مطعم ( باكه ) ولا ( باجه )


دمت بود ومحبه
( ناصر )

كويــتي لايــعه كبــده يقول...

تقشف والا مو تقشف بروي ماكلني أكال مع اليهال

والا الفميص الا تقول عنه بالشهر تشتريه مره انا اتسوق بالسنة سنتين مرة ولي سافرت


والتعليق على الدويسان قريته بالآن وضحكت مثلك

الربع مزاج

انجازات صفر لكن امسك بطنك

حلم جميل بوطن أفضل يقول...

الحمدلله سفيد علق من غير ما يدخل في علوم الكلام و اللاكلام و الفلسفة

المهم

محمد ابراهيم كان ناوي يلعب كيتا في دورة الخليج الأخيرة علشان تكتمل صفة لواعيب القادسية في المنتخب

و بعدين شفيك محتر من اللي يسولفون في التلفون. يمكن يسولفون مع زوجاتهم قبل الدوام. الواحد ما يلحق يشوف أهله و عياله

فريج سعود يقول...

عاد تصدق اني هذاك اليوم رحت الافنيوز وبراسي شر

عندي فلسين حاريني وبصرفهم غصب
طيب

حست وحست وحست

ولا عجبني شي ولا اكو شي واحد سعره فيه

اي شي ثم اي شي ثم اي شي

رجعت البيت وفلوسي بكرتي زالحين قاعد اتهدد على مجمع ثاني

مَـــــعْــــمَــــعَـــــه يقول...

والله عبدالحسين مو طبيعي وتوقع منه اي قطه الريال دمه خفيف بالفطره .

اما اللي يتكلمون الصبح الصراحة امرهم غريب يعني منو اللي فاضي يسولف هالحزه والله انا لي التسع او تسع ونص يالله ابطل حلجي اسولف والا قبل التسع يدوب تطلع الكلمه

Unknown يقول...

فيصل الدويسان راح ينزل بالأولى . راح أصوت له انشاءالله . شخص مهذب ونظيف وعسى الله يوفقه لخدمة الكويت .

غير معرف يقول...
أزال المؤلف هذا التعليق.
غير معرف يقول...

العزيز راعي الباكه

يا بخت اللي يسولفون الصبح بالتليفون مع أهلهم والا ربعهم .. أنا إن تكلمت في بكرة الصباح تلاقيها السكرتيره و جدول أعمال و شغل ...

يقولك خفة الدم هذي مكتسبة من ضغوط اليوم .. عادي ..

وعلى طاري الضحك .. قضيت أمسية على برنامج اللوبي على العدالة !! بليز شوف البرنامج كل يوم على 10 تقريبا يطلع ..امس ضيف الحلقة رجا الحجيلان ... و الهوست الدائمين د.عايد المناع ، حمود فليطح ، حسن الأنصاري ، جابر الهاجري وفي واحد بعد مايحضرني إسمة... لا تعليق :))
----------

فريج سعود

توجه إلى الصالحية دون تفكير ..

دمت بخير وسلام

سيدة التنبيب يقول...

بالنسبة لنكت الكويتيين لا أدري لماذا لا أستطعمها و لا أشعر أنها نكت كما يجب .. النكتة التي أفهمها تكون تنفيسا عن وضع معين .. أما نكتنا فتكاد تكون طنازة ..


الدويسان رجل و مفكر بمعنى الكلمة ..إن شاء الله ما تغيره السياسة

ابو البراء يقول...

دام انت تشتري قمصانك من الافنيوز وتخاف من لحظة صفاء الذهن علشان نفسك ما تحاسبك عيل مو غريبة ان تكون عندك سياسية التجنيس بايخة لا وتأييد المطالبة بتجنيس كيتا ، صج اللي ايده في الماى مو مثل اللي ايده بالنار ، ومحد يعرف صعوبة المعاناة الا اللي عاشها وحسها

bakah يقول...

الاخت الكريم جاندل دانشل .. حياك الله اختي .. :)
اتمنى اولا ان يكون الأسم صحيحا كما كتبته :)
وثانيا انتم مرحب بكم دائما للتعليق والنقد اختي الكريمة :)
..
اها , هذا تبرير منطقي ومقبول جدا جدا , فهو اولا صلة رحم والوالده اكيد تحب هالإتصال الصباحي , خصوصا الشياب الله يعطيهم العافيه يقعدون مبجر :) , وثانيا بسبب النقصة التي لابد منها , علشان تكشخ المره على ريلها وتقعد تمن عليه ان امها مسوية لهم غدا :) ..
اما التقشف , صدقيني في اشياء وايد رخيصة وحلوة حيل ..
اصلا انا مستغرب من النساء والله , يعني اعطيكم مثال , عندنا فتاة يافعه الله يخليها لأهلها معانا بالدوام , ومبين من سيارتها ان اهلها شايفين خير :) , لكني كنت دايما انقد على ملابسها , ملابسها مو حلوة ودايما شكلها غريب ..!
فلما نقلت وجهة نظري المتواضعة لأحد الأصدقاء المتزوجين , وبحسب خبرته كحمال كياس للمدام في الأسواق , فعنده حس بالموضة , فقالي يا حبيبي هذي الموضة الحين وملابسها حيل غالية ..!!
فاذا كانت الموضة شكلها غريب ومو حلوة , انا اظن ان التوفير بشراء الأجمل .. ولكم مطلق الحرية يا معشر النساء .. :)
شكرا لمروركم اختي ..

bakah يقول...

الأخت الكريمة طز بالرجالة .. :)
اولا .. أشوه ان طز بالرجالة مو بالريايل , لأن الرجالة مصريين بس :) عدل ؟ !
والله يمكن تكون نكتة , لكن الي نقلها لي قالي اسم الممثل الله يرحمه , بس نسيته ..!!
اما نظرة الناس لمن يشتري من هنا او هناك , هذي الحمد لله مو منتشره بالأوساط الي انا مختلط فيهم , عندنا واحد من الربع مرة غلط وقال انا مشتري بدلة بـ 500 دينار , ومصخروه الشباب لين قال بس , خلوه بيزه ما يسوه , طبعا العموم مو مصدقين فقزروها عليه طنازه , لكنه طلع صج مشتريها بـ 500 دينار ..! :)
وهو فعلا شيء صعب ان يكون الإنسان محاطا بأشخاص يفكرون بهذه السطحية .. الله يعينهم :)
اشكر مروركم اختي , واتمنى لكم كل التوفيق في تهزيء الرجاله الي ما يعجبونج وحيلج فيهم .. :)

bakah يقول...

حياك الله عزيزي سفيد .. :)
اي والله هالمواقف تكون جدا بايخه احيانا بس ما تمسك عمرك من الضحك .. :)
مرة رايحين للطبيب انا وابوي واخوي الصغير , فالدكتوره قاعد تشرحلي حالة الوالد , واخوي الصغير واقف وراها ويسوي نفسه فاهم الي قاعد تقوله , يعني يسوي إيماءات بويهه وبإيده , انا قاعد ابتسم بالبداية , بعدين صارت قهقهة , تاليتها خليت الدكتوره وطلعت من المكتب قمت ابجي من الضحك , ابوي زفنا زف يومها :) ..
نادي حكومة ما اقول لأ .. :)
اما التلفون فشي غريب والله , انا بحياتي كلها ما عديت الـ 20 دينار بالشهر مكالمات – نظام كروت :) - , الا مرة وحده ايام الصبا ههههههههههههههه , لكن الي اشوفه الحين العالم تلفونين وثلاثة , واهو طرطنقي ما عنده ما عند جدتي ..!
هههههههههههههههههههههههههههههههه .. سالفة البنطلون والإيراني كبي بيست عند اخوك , بس انا يشبهون علي باكستاني او افغاني لأني اسمر ههههههههههههه ..

bakah يقول...

حياك الله عزيزي مطقوق .. :)
الدائرة الأولى اخوي .. ولا تنسى عيسى حجي موسى معاك :) ..

bakah يقول...

حاطب ليل .. حياك الله اخوي .. :)
نعم جريدة الآن مو أوان .. خربطت .. :)
نعم , احنا كثير اشياء طفنا فيها المصاروه , حتى بالرشاوي صرنا حدهم مو بعيدين ..!
الي موظف كويتي قام ياخذ كرت دينار ونص .. والله زمن اغبر ..!
وزين تسوي بخصوص التقشف , ترى يبي يجيكم يوم تصير الدجاجة بألف ناقه :)

bakah يقول...

حياك الله اخي الكريم ناصر .. :)
بوعدنان روحه حلوة علشان جذي يحبونه الناس :) , اكيد عمك ابتلش فيه , لأن ما يبي يضحك ويعمل مجهود , وبوعدنان مستلمه نكت :) ..
الأسم : مطعم باكه .. لو شايف مسلسل درب الزلق لما عبدالحسين يقول لسعد مطعم بااااكه .. شلون تنكتب :)
شكرا لتوقفكم اخوي .. :)

bakah يقول...

حياك الله اخوي كويتي لايعه جبده .. :)
بروي هذا وشو ؟ !! :)
الله يعينكم .. المتزوجين مساكين .. :)
لكن بعون الله هاليهال الدقدق يكبرون ويبرونك ويبدونك على نفسهم مثل ما انت مبديهم على نفسك ..
دمت وعائلتكم الكريمة بخير وعافيه ..

bakah يقول...

الحلم الجميل حياك الله اخوي .. :)
هذا الموجود , القادسية هو الفريق الوحيد الي فيه لاعبين كويتيين جيدين في اماكن مختلفة , ومحمد ابراهيم دايما عذره ان فترة الإعداد قصيرة علشان جذي ياخذ لاعبين القادسية كلهم لأنهم متفاهمين ..! :)
انا ضد سياسة تجنيس اللاعبين .. لكن ارجع واقول لو يبون يجنسون , اهو افضل لاعب واكثر واحد محتاجينه بالمنتخب :) ..
..
الي يسولف مع زوجته هذا اكيد يحبها موت واهي راضية عليه , لأن عفيه خلق مجابلها الليل كله , ويقعد الصبح يكلمها بعد . . :) ..!
عموما اذا كانوا الي يتكلمون متزوجين , فانا اشد على اياديهم واشجعهم على هذه العادة الحميدة :) , بس علشان لا تزعل :) ..

bakah يقول...

فريج سعود .. حياك الله اخوي .. :)
والله زين منك حست وحست وحست ..!!
تدري انا اول ما دشيت المجمع دخلت اول محل , وطوالي على قسم الملابس الرجالية اخذت ست قمصان وجينز , من الستة اخذت اربعة والجينز والحساب 115 , دفعت ومشيت ..!
تصدق لو طالع من المحل ومو مشتري , لو اموت ما ادخل محل ثاني ..! :)
انا اقول خل فلوسك عندك , الحين ازمة عالمية :) , والأوضاع ما تسرش , او سافر فيهم للعراق مره ثانية , بس هالمره انا اخاويك لو بغيت تروح :)

bakah يقول...

معمعه .. حياك الله اخوي .. :)
ههههههههههههههههههه , والله قوية للتسع ما تتكلم ههههههههههههههه , ضحكتني والله , هذا واحد من الربع جذي , بس هذاك شري , ومزاجه يكون معتفس اول النهار , محد يقدر يكلمه الا لما يصحصح .. :)

bakah يقول...

اخي الكريم ABC حياك الله .. :)
والله ونعم منك ومنه , ونتمنى له التوفيق ان شاء الله ..
التعليق لم يكن انتقاصا من شخصه , لكن طرفة اظن انه هو شخصيا سيضحك لو قرأها :)

bakah يقول...

التي لا تحب الإنتظار .. حياك الله اختي .. :)
يمعوده هم زين عندج سكرتيره تكلمينها :) , اكو ناس تلفونها ما يدق كلش ملش :)
ولو اني ما اظن ان في العدالة عندنا في الستلايت بالبيت , لكن اشوفه ان شاء الله ,
رجا حجيلان الملقب بـ كنتاكي :) , خوش ولد ويستاهل احد يتابعه .. :)

bakah يقول...

سيدة التنبيب .. حياك الله اختي الفاضلة .. :)
الناس فيما يعشقون مذاهب , عن نفسي اموت على شي اسمه نكته كويتية ..! ولكن فعلا هي قاسية كما تفضلتم , واحيانا كثيرة يكون فيها تحبيط وانتقاص من بعض الناس .. :)
الله يوفقه الدويسان , رغم اني غير مقتنع بكفاءته السياسية , لكني احترم اطلاعه وثقافته ..

bakah يقول...

اخي الكريم ابو البراء .. حياك الله .. :)
اعتقد انه يجب عليك قراءة البوست مرة ثانية ..!
انا قلت انني اشتريت مرة من الأفنيوز , وحتى لو اشتريت كل يوم وكل دقيقة من الأفنيوز فهذا لا علاقة له بأي حال بنظرتي لقضية البدون مثلا ..!!
اما مسألة التجنيس فلست ضدها , انا قلت اني ضد تجنيس المحترفين الأجانب ..!
تجنيس البدون قضية اخرى لم نتطرق لها من قريب او بعيد ..! :)
اشكر توقفك اخي واتمنى من الله ان تتحقق كل آمالك ..

بو محمد يقول...

عاد تصدق
أنا وايد احترم الدويسان
أخلاقه عالية جدا
و بالنسبة لسوالف التلفون
ايونك آخر الشهر يتحلطمون على الفاتورة
و بالنسبة للأفنيوز و أسعاره
لو مو لاقي ناس تشتري ما باع بهاذي الأسعار
شعبك يبه يحب الخبة
و هلى الهبني
يلبس بمليون و ياكل بمليون و يركب بمليون و يسكن بلميون كل اللي داخل عقله من علم و معرفه و انتاج ما يوصل حتى 10 فلوس، و كله يتشرهون و يعايرون بعض و يغارون من بعض
يموتون على المظاهر الكذابة
طبعا مو الكل، و لكن أكثر من النص
دمت و الأهل و الأحبة برعاية الله

bakah يقول...

بومحمد .. حياك الله يا الحبيب .. :)
والله دام انت تقول اخلاقه عاليه , اذا اخلاقه عاليه .. :)
انا اصدقك .. :)
صحيح كلامك بخصوص الأفنيوز , حتى عبدالحسين تكلم عنها مرة بمسرحية فريج بني صامت اظن , لما يقول ان الكويتيات يسألون ولو شافوا السعر رخيص ما يشترون ولو غالي يشترونه يحسبونه شغل عدل ..!
والله يا اخي شنسوي , هذا الموجود , هم زين 10 فلوس , اعرف شباب انتاجيتهم بالسالب ههههههههههه
دمت والعائلة الكريمة بألف عافية .. :)

غير معرف يقول...

بييييييه قميص بعشرين دينار
غالي
?

من صجك

انت يا حساوي
يا جعص

bakah يقول...

حياك الله اخوي غير معرف .. :)
يصير أتصل بصديق ؟ :)
الله يهديك صكرتها , انا موحساوي , والا لي الشرف اني اكون حساوي .. :)
يمكن اكون جعص احيانا .. حسب تعريفك للجعص .. :)
شكرا لمرورك الكريم كرما حاتميا .. :)

@alhaidar يقول...

كله كوم .. وسالفة عبد الحسين كوم :)))))))))))))))


وكيتا إذا صار كويتي يقوم يبوش ;P

bakah يقول...

العزيز أحمد الحيدر ..
عز الله يبتها .. !! :)