الأربعاء، 14 أكتوبر 2009

والله الماستر حلو ..!

.
.
رحت قبل أمس لكليتي العزيزة - كلية العلوم - , ومررت على الديار :) , تذكرت مغامراتي بالكلية - اللي يسمع يقول غريندايزر :)- . القائمة العلمية كانوا يحتفلون كالعادة , مع انهم اسلاميين الا انهم اكثر ناس يردحون ويرقصون بالكلية ! , أتوقع لو الوسط الديموقراطي سووا مثلهم جان كفروهم !!

أول شي كانت وصلة من الرقص والتصفيق , تقدرون تقولون هوسات , بس بعدين قاموا يدحون :) , اللي موتني ضحك هو النظرة على وجه صبي شكله حضري , واهو يراقبهم في بداية الدحه :) .. مسكين كان مندمج مع الوصلة الأولى مالت الهوسات ههههههه , بس لما بدت الدحه تنح , حسيته يقول بقلبه : شفيهم الجماعة قلبوا بعارين !! :)
.
.
خليناهم ورحنا لقسمنا القديم , طبعا انا من كثر ما كنت شاطر وعبقري , كل الدكاترة ما يذكروني! , ما صارلي سنتين من تخرجت , ولا دكتور يذكر اسمي ! . سلمنا على دكتور سوداني - خبل :) - جان يقول ها صايرين نظاف ! , اكيد توظفتوا وصار عندكم فلوس هههههههه , ايا ابن الــــ..... , كسر فينا :)

حضرت محاضرة مع طلبة الماستر , اعادتني إلى عالم الدراسة الجميل , خصوصا ان القلب حاضرها :). وآآه يا القلب .. خلوني ساكت بس لا اصير مثل قيس المخبل ... :)

صج الماستر حلو .. اذا هالطلبة هم طلبة الماستر .. :)

ما اقول الا يا ليتنا كنا معكم .. مع ان الدوام ما يسمح والمعدل كلش ما يترقع ..!!
.
.
كلية العلوم من الكليات المظلومة في جامعة الكويت , لأن الداخل إليها مفقود , والمتخرج منها مولود , واللي معششين فيها بالآلاف ! , كلية صعبة حيل , مع مستقبل مبهم وما يستاهل ..!

تدرون ان طالب كلية العلوم لو توظف بالقطاع النفطي يوظفونه بدرجة وظيفية أقل من المهندس !! , مع ان العلوم والهندسة كلاهما بكلريوس ! , هذا النظام - ولله الحمد - غير معترف فيه بالشركات الخاصة اللي تحترم نفسها. شنو فرقنا حنا عن المهندس ؟ قولولي يا اخواني المهندسين :) , انا اتحدى اي مهندس كيميائي خريج يعرف بالكيمياء احسن من طالب كيمياء بالعلوم سنة ثانية جامعة :)

ليش جذي ..؟

والله ظلم ..
.
.
شرايكم فيني وانا اطالب بحقوق اخواني العلماء - قوية علماء عدل ؟ :) - ..

بصراحة فكرت ارشح نفسي حق رئاسة جمعية الكيميائيين الكويتية , لكن بعدين شفت انها ما تستاهل , خصوصا اني مو عضو بهالجمعية اساسا :) ..!
.
.
وبالنهاية نصيحة لكل شخص يفكر بدخول كلية العلوم مكونة من كلمة واحدة :
إنحش .. :)

هناك 35 تعليقًا:

Deema يقول...

أنا أقول إذا عندنا بالكويت كيميائيين خل يسوون جمعية لحماية تحميض الأفلام، و ينتجون مظهر و مثبت ألوان الطباعة صناعة وطنية

أو مثلا خل يسوون محلول سحري...

تروالي لو تحاولون تغيرون المسمى إلى عالم كيمياء، احتمال كبير يتساوى الكادر :)

:: بـوح الصمـت :: يقول...

أخوي معاك حق بكل كلمة قلتها !
كليّة الهموم أقصد العلوم أكثر كليّة مظلومين طلبتها .. دراستهم صعبة حيييل وآخرتها يقطونهم صخر والدكاترة مش ولا بـد :/ !!

بصـرآحة أنـا بس آخذ مواد تخصصي فيها يعني أنا مو هناك بس جد شايفة الوضع المُزري وال21 مادة اللي عليّ بالتخصص كلهم ما بين كيميا وبيولوجي حددهم يشقون شق ولو إني آخذ 2 أو 3 بالكورس فشلون اللي يدرس جدول كامل من هالمواد !

غير جذي دكاترتهم ما يراعون الفروق الفرديّة بين الطلبة .. ويتفلسفون يعني من طقة إحـنا اللي ما نتكلم إلا إنقلش وإحـنا دارسين مادري وين !!

الماستر حلو :)
فعلاً لكن مو بهالوضع المُزري !

أغلب اللي أعرفهم يدشون علوم يحولون .. الحالة مأسآوية مع إنّ دراستها قويّة بس نسبها أقل النسب :/

عُذراً على الإنفعال لكن جد الوضع يقهر !!


عسى ربي يوفقكم ويرزقكم أكثر من ما تتمنون يـارب ..

شاي الضحى يقول...

يا كثر الجمعيات بالكويت

الدكاتره وتعليقاتهم ما نخلص منهم ... انا اول ما تخرجت رحت الجامعه جان يقولي الدكتور جذي التخرج يحلي؟!!!

حسسني اني 4 سنين عشت بالجامعه جيكره هههههه

استمتعت بقراءة البوست ... مشكور :)

ma6goog يقول...

يا معود يدحون و لا ان يدبكون

Eng_Q8 يقول...

متخرج من العلوم والله عبقري بصراحه

كليتكم بصراحه اتلوع الجبد لا من مناهج ولا من دكاتره ولا من مباني ولا من كافتيريا .. بصراحه اهنيكم اشلون استحملتوا

وبالنسبه حق المهندسين الله يسلمك جان حولت من العلوم حق الهندسه وينتهي الموضوع :) وبعدين يا اخي شغلنا غير شغلكم

ماني كيميائي والا جان داحرتك :q

chandal/danchal!! يقول...

على زمانا كانوا يكبرون ويصلون بجواتيهم "مكرم السامع"
.
.
.


كلية العلوم تنخل الواحد نخال... مو من صعوبة موادها لكن دكاترتها مكهربين وايد ناس حولت والسبة خوفهم من مواد اول سنتين بالعلوم

الوحيدين اللي كانت لهم سهلة وكأنهم يتمشون بحديقة وهران... اخوانا طلبة كلية الطب

:)


مافي احلى من الدراسة... ليش ما تدخل

under/graduate

وبعدين تحول!... في برنامج ماستر يصلح لك... علوم بيئية ورئيسته د. فوزية الرويح... محاضراتهم الاسبوعية قليلة وتبلش بوقت متأخر
.
.
.

أتفق معك بأنكم تستحقون تقدير لشهادتكم

why me يقول...

انت عبقري لانك خريج هالكليه

المقوع الشرقي يقول...

محتاجين علماء دحة:)


لا تحسف
الكيما اشتغلت معاك بطلبة الماستر

:))

غير معرف يقول...

اممممممم المدون خيميائي .. شي طيب
اشرايك في لقاح انفلونزا الخنازير >> أدري كيميا مو صيدلة بس كلها خلطات :D

Safeed يقول...

الله يعينك، دارس كيميا، و بكلية العلوم بعد! لو أنا مكانك جان ينيت.. أو انتحرت :)

.
.
أثاريك من ربع "وما حب الديار شغفن قلبي، ولكن حب من سكن الديار" ..
بحالة وحدة تصير احسن من المهندسين،
كمل الماستر والدكتوراه، بعدين عط كل طالب يصوتلك بالانتخابات A وبجذي تضمن معاش تقاعدي مبكر من الجامعة، ومعاش عضوية بمجلس الامة! و لا اقدعها مهندس يحصلهم :)

Dark angel يقول...

كمّل الماستر في بريطانيا

تحتاج الى سنة واحدة من الدراسة فقط اذا كان نفس التخصص الذي درسته مسبقا في الجامعة وتحتاج الى سنتان اذا كان التختصص الذي تنوي تحضير الرسالة متخلف عما درسته في الجامعة.


شفت أكثر من هيك بساطة ! :)

ريانة العود يقول...

العلوم :/


الماستر
هههههههههاااي
خووش!

حلو يكون عندك دافع تحضر شي مالك خلقه !
بس مو كل يوم !

غير معرف يقول...

I'm one of those who graduated from this college

I don't think it is too hard and at the same time it is not easy
or less than other colleges

BUT

I believe that the students do not study or they do something different from what it is supposed from them to do
!!
أنا متحفظ جدا على أداء طلبتنا و طريقة تفكيرهم
ترتيب سلم أولوياتهم .. قدرتهم على تحمل المسؤولية
و أشياء وايد


btw I'm a an engineering master student now and I can
say - for me -it is easier than science since that it is near from
the application level rather than the theory level
!!
 

Regards

مطعم باكه يقول...

ديما .. حياك الله :)

اهم جمعية الكيميائيين ومو مسجلين فيها , تبينهم يسوون جمعية لحماية تحميض الأفلام ..! :)

يمعوده اهم خل يعطونه مسمى اول شي !!

في وايد اماكن - وزارات وغيرها - الكيميائي يسمونه فني ..!!

تصوري انا لو اتوظف بوزارة الصحة يسموني فني ..!!

اصير ممثل احسنلي :)

مطعم باكه يقول...

بوح الصمت .. حياك الله :)

اكثر ناس يتعبون هم الطلبة اللي مو متخصصين بالكلية ..

المواد الأولية بالكلية اغلبية اللي يدرسونها هم الدكاترة السيئين , بالتخصص اشوه شويه , يعني اكو دكاترة زينين يدرسونها .. :)

اغلبية الطلبة اللي يسجلون بالعلوم يسجلون لأن معدلاتهم ما تسمح لهم يروحون اي كلية ثانية ..!

مطعم باكه يقول...

شاي الضحى .. حياك الله :)

هههههههه ..

عاد المفروض الإنسان لما يكون دكتور يكون ذكي , لكن للأسف مو كل ذكي يعرف يتصرف :)

مطعم باكه يقول...

مطقوق .. حياك الله :)

لو انهم يدبكون جان انا اول واحد انزل .. :)

مطعم باكه يقول...

مهندسنا .. حياك الله :)

والله المناهج حيل حلوة , ونفسها اللي تُدرس في كليات العلوم بأمريكا وأوروبا , المشكلة بعقلية الدكتور , لما يكون دكتور وعقليته عقلية مدرس ثانوية , هني تكون مشكلة :)

يبونا نحفظ كل شي ..!

طبعا مو كلهم .. اكو دكاترة كانوا يبونا نفهم , وهذيلا انا كنت دايما اتفوق عندهم , وازفت عند الباجي :)

والله بيني وبينك معدلي بالثانوية كان بالأرض , ولما دشيت العلوم حبيتها :) , فما حولت .. :)

مطعم باكه يقول...

جاندل .. حياك الله :)

على ايامكم الكلية كانت عشيش هههههههه , والطلبة كانوا يدرسون بالمسجد بحلقات العلم :)

صاجه .. عز الله مكهربين :)

ومصرقعين ..

والمشكلة انا لما دخلت الكلية كانوا دكاترتي كلهم كبار حيل ..

يعني شلون ديوانية شياب والكل معصب , يصير الزف بالشباب الصغار على ادنى سبب :)

والله انا ما اداني البيئة بالمرة , واحب الكيمياء حد العشق , لكن مو راضين يسجلوني :(

مثل ما يقولون :

اللي يبينا عيت النفس تبغيه
واللي نبيه عيا الدهر لا يجيبه :(

مطعم باكه يقول...

واي مي .. حياك الله :)

انا اختلف معكم هههههههه

لو عبقري جان متخرج بمعدل زين :(

مطعم باكه يقول...

المقوع الشرقي .. حياك الله :)

افا عليج .. بهالسوالف اللي يفيدج هو قناة الوطن , دزي لهم هالفكرة يسوون برنامج داحوح الكويت :)

اي والله ..

مو كلنا كيميائيين .. فالكيمياء تشتغل بين قلوبنا بشكل قوي :)

مطعم باكه يقول...

ورق مخطط .. حياك الله :)

والله ما عندي خبره بهالأمور :)

بس اذا انسان طبيعي ومناعته زينه , ما انصح ياخذه ..

مطعم باكه يقول...

سفيد .. حياك الله :)

ومنو قالك اني عاقل الحين ..؟ :)

ايييييه يا سفيد :)

اصلا لو مو ساكني الديار .. جان وحياتك انا ما تخرجت من الكلية , هم السبب الوحيد اللي مخليني اداوم :)

اكمل ماستر ودكتوراه .. وبعدين اتركها واصير عضو ..!! :)

صدقني ساعتها اكون صج خبل ..

اصلا دكتور بالجامعة هذي احسن وظيفة بالكويت , احسن حتى من المجلس :)

مطعم باكه يقول...

دارك انجل .. حياك الله :)

تسع شهور .. واحد من الربع خلص ماستر بتسع شهور :)

المشكلة ما اقدر اترك الدوام , والا بريطانيا حيل سهالات الماستر مالهم :)

مطعم باكه يقول...

ريانة العود .. حياك الله :)

انا يوم واحد ما قدرت اكمل .. خلصت محاضرة وحده وانحشت :)

مطعم باكه يقول...

غير معرف .. حياك الله :)

اهي مو صعبه كمنهج دراسي .. لا صعبه بسبب عقلية الدكاترة القديمة , اللي يقدسون شي اسمه حفظ ..!

والا الماده العلمية حيل حلوة , انا عن نفسي حيل استمتع بقراءة كتب الكيمياء .. :)

صحيح .. الهندسه مباشره وتحس وانت تدرسها بقيمة اللي تدرسه , اما العلوم فالتطبيق بعيد حيل عن الماده العلمية , وتسعين بالميه من العلوم مالها تطبيق للحين :)

شكرا لك ..
تحياتي ايها الزميل .. :)

غير معرف يقول...

قاعد افرك عيني .. افرك عيني .. افرك عيني ..
يعني اكو احد تخرج من الكيميا بالعلوم !!
شي طيب !
انا على بالي اني الطالب الوحيد اللي راح يتخرج من قسم الكيميا !!
تصدق
دفعتي (2006) انا الطالب الوحيد كيميا !!
حدي لا تعليق ...
و الوظايف زفت و المسميات فني ..
فشي اكيييد اني راح اكمل الماستر علشان اندعس بأحد ممرات كلية العلوم ... و لا انه ينادوني فني بعد شقى السنين بالعلوم !!
( قبل فتره اكو طالب علق لوحه على باب الكليه كان مكتوب فيها مقبرة الجامعه .. كلية الهموم )
بس الامن شالوها بنفس اليوم !
حسافه كنت داخل محاضرتي و طلعت ابي اصورها ما لقيتها !

كويــتي لايــعه كبــده يقول...

"عالم الدراسة الجميل"!؟!؟
انت أكيد متخرج من جامعة الكويت!؟

ما شاء الله متخرج قبل سنتين وتسميها ذكريات :)
حنا شنقول اذا المناطق تغيرت ملامحها والمباني مو موجوده؟ :)

Sn3a يقول...

يه!
انت رديت وانا مادري;S

صج ان صارلي اقل من سنه
بس حتى الدكاتره اللي مادرسوني يعرفوني;p

ضحكتني عالرقص
انا صج اذكر رقص العلميه واموت ضحك
خاصه لما تتذكر المبدأ وتشوف الرقص
;p

شوقتني عالماستر
مابقى شي عالتسجيل بس الدوام بعد سنه
الله كريم


وبيني وبينك
كليه العلوم صج صج مظلومه
اصعب شي بالدنيا ان الواحد يدرس بيور ساينس
بيور فيزكس وكيميستري وماث
وغير دكاتركم الفله
صراحه وايد يشجعون على العلم ;p
الا جم دكتور يهبلون

وبعدين ليش حاط دوبك دوب الكيميكال انجنيرز!
انا احتج
شفيكم عبالكم كيميكال انجنيرز يعني لازم يعرفون 100% بيور كيمستري
احنا بروسس انجنيرز
كونترولر انجنيرز
سيفتي انجنيرز
كد انجنيرز;p

وبعدين طالب العلوم سنه ثانيه يكون ماخذ كيميا 1 وكيميا 2 ان كان تخصصه علوم
واحنا خذينا كيميا 1 و2 ولاباتهم وبالاضافه الى الاورجانيك والاناليتيكل ولاباتهم
يعني انا اللي اتحدا طلاب العلوم مو اهم اللي يتحدوني واهم حتى الفرق بين الالكان والالكاين ينسونه;p


عاد انت مايبت طاري الكيميكال انجنيرز الا عندي وانا مدافعه درجه اولى عن قسمي اللي احبه

Sn3a يقول...

صج خيو ليش ماتسجل غير مقيد؟
معقوله حتى غير مقيد مايقبلون
يتروالي يستثنون شرط المعدل

بو محمد يقول...

ههههههههه

مطعمنا الحبيب

كلامك الذي قلته غي حق كلية العلوم أتفق معه تماما، و ما تفضلت به بخضوض اعتبار الحاصل على بكالوريوس الكيمياء يوضف على درجة أقل من المهندس أيضا صح، لأن عقلية المسؤولين لا تتحمل التمحيص العلمي و بالتالي ما زالت تعتمد على غبار الماشي من أن المهندس يفتهم و الكيميائي ما يفتهم مع إن الكيمائي أكثر ضلاعة من المهندس في علم الكيمساء بينما المهندس أكثر ضلاعة في علم الهندسة، واحدهم يدرس التفاعلات بطبيعتها الفيزيائية و الكيميائية و الآخر يحاول بناء مفاعلات تجسد هذه الدراسة على مستوى انتاجي ضخم، هذا باختصار نوعا ما

و أما عن جمعية الكيميائيين فكلامك أيضا صح، كلكجية و جمبازية يا ابن الحلال

و أما عن كلية العلوم و بالتحديد قسم الكيمياء فأقول، ما دام الدكتور يعيش حالة من التعالي و التحدي مع الطلبة فلا عزاء للنتاج العلمي عزيزي

و بالنسبة لصاحبنا اللي اخترع من الدحة، الظاهر انه من اللي يدقون لهم ناي لين بغوا ينامون


دمت و الأهل و الأحبة برعاية الله

مطعم باكه يقول...

سنفولي .. حياك الله :)

لا اكو وايد طلاب كيمياء يتخرجون :)

انت ما تعرفهم لأنهم مختفين بالكليات الثانيه :)

يخلصون تخصصهم المساند :)

بالتوفيق ان شاء الله ..

مطعم باكه يقول...

كويتي لايعه كبده :)

تصدق هالكلام اللي كنت اقوله قبل لا اتخرج .. بعد التخرج بكورس حسيت بشوق كبير للكلية :)

يمكن لأني كنت ماخذها سياحة !! :)

اقل من سنتين :)

مطعم باكه يقول...

سنعه حياك الله :)

كنت اتغشمر بهذي الجزئية :)

لأني اعرف الفرق بين المهندس الكيميائي والكيميائي .. ربعي بالدوام كلهم مهندسين كيميائيين وانا الوحيد كيميائي .. صج اكو فرق .. بس بسهولة انا اتعلم اللي اهم يسوونه واهم يتعلمون اللي انا اسويه :)

مطعم باكه يقول...

بومحمد .. حياك الله :)

الدكاترة في بعضهم يعتقدون انهم آلهة !!

اما جمعية الكيميائيين .. خرطي .. هذا كل ما يمكنني ان اقوله :)

دمت بخير ..