الأربعاء، 10 يونيو 2009

أخطبوطيات .. خاشوقية..!!

.
.
هل انت انسان قلق ..؟ :)
انا عن نفسي اعاني من رهاب المواعيد ورهاب اتمام الأشياء , بمعنى اني لما يكون عندي موعد بمكان , اذا الطريق ياخذ عشر دقايق , انا اطلع قبلها بساعتين !! خوفا من ان يصير معاي بنجر!! علشان لو صار بنجر اكمل مشي والحق على الموعد :) , اتذكر ايام الجامعة , الإمتحان الساعه 8 , الساعه 6:30 انا واقف بمواقف كلية العلوم , اقعد نص ساعه افتر بالكلية , بعدين اروح اشتري باكيت زقاير , مع اني ما ادخن زقاير , اسحك الباكيت كله :) , اسوي كل شي , بس شي واحد ما اسويه , وهو اني ادرس ههههههههههههه , لأني لو درست ما اعرف احل , لازم اخلي جابتر او جابترين بدون لا ادرسهم , والا اضيع وما احل شي !!

اما رهاب اتمام الأشياء , فهذا شيء جديد اظن , وهو اني كلما وصلت لنهاية مشروع او عملية او نهاية كورس , تصير فيني حالة من الخبال هههههههههههههه , اقوم اهوجس , مستحيل يخلص !! , اكيد اكون ناسي شي ...!!!

لهذا عندما انتهي من شيء اعمل عليه , وبعدما امر بكل هذه العقبات هههههههههههههه , تييني راحة نفسية عجيبة , مثل اليوم العصر بالدوام , صارلي اسبوع ادور بالكتب عن معلومة معينة , ما خليت كتاب ولا موقع انترنت ما فتحته , خلال هالأسبوع تعلمت عن هالمجال اكثر مما تعلمته بالجامعة خلال اربع سنوات :) , واليوم اخيرا اكتشفت المعلومة , وكانت راحة نفسية عظيمة :) , من كثر ما قريت كتب ومعلومات , حسيت المكتب صار زحمه من كثر الأفكار المتطايره .. :)

هل تعانون من هذه الأمور ؟ والا بس انا خبل بروحي ؟! :)
.
.
قبل كم يوم صار نقاش بالشيشه حول كلمات قديمة اندثرت ومحد قام يقولها , ذكروا الشباب كثير كلمات , وصراحة كلمات بعضها يضحك , رغم اني كنت اقول بعضها وانا صغير , الا ان نطقها الحين خلاني اضحك ما ادري ليش ..!! :)
مثال على الكلمات الي ذكرت :
خاشوقة ( قفشه ) هههههههههههههه , هذي بالذات موتتني ضحك , اسمها اجرامي , خاااااااااااشوقه :) , وما اعرف اصلها اللغوي بس ما اظن كلمة عربية ..!!
هشكل ( جذي ) , وكلاهما يرجعان لأصل عربي , هشكل اختصار بهذا الشكل , جذي تحريف عن كلمة كذا , او كذي , لكن حولت الكاف جيما على حسب لهجة اهل البحرين ..!
ماعون , جمعها مواعين , قليل تستخدم بالأوساط الشبابية , لكن بعض العيايز والشياب يستخدمونها :)
باديه ( طاسه ) ..
خرجه ( قطعة خام ) .. :)
وكلمات كثيرة غيرها , لعلكم تذكرون بعضها للفائدة ..؟! :)

طبعا اكو شياب راح يقولون ان هالكلمات للحين متداوله , لكنهم معذورين , ( ما اقصد احد معين ) .. :)
.
.
لخولة أطلال ببرقة ثهمد ...
تلوح كباقي الوشم في ظاهر اليد
وقوفا بها صحبي علي مطيهم ...
يقولون لا تهلك أسا وتجلد

معلقة طرفة بن العبد من أروع المعلقات , وأقربها إلى قلبي ..!!

هناك 24 تعليقًا:

مَـــــعْــــمَــــعَـــــه يقول...

هل تعانون من هذه الأمور ؟ والا بس انا خبل بروحي ؟! :)

والله يا اخوي انا عن نفسي ما اعاني من اللي تعانيه وعلى النقيض من تصرفاتك تماما مثلا الموعد الساعة 9 اطلع من البيت 8.50 واوصل الساعة 9.30 . اقل وقت اتأخره نص ساعة

ايام الجامعه اول محاضره آخذها 11 لان قبل الساعة 11 مستحيل ما اتأخر وهذي نعمه طبعا

chandal/danchal!! يقول...

هل انت انسان قلق؟


نعم ويس وسي و وي


الكويتيين مصرقعين... بدليل روحتهم المطار قبل موعد الاقلاع بأربع ساعات!!!

عندي قلق من التاكس فري!!... كل احاتي ما يعوضوني لدرجة اني قمت ما اسوي تاكس فري بالمحل واعطي الفواتير كلها حق امي... كافي علي نرفزة الطيارة... والكويتيين يخربون اللي ما يخترب... تصدق يمشون التاكس بكرز زقاير!!!


بخصوص الدراسة... حدي لي المغرب بعدين تحوشني قمتة من الظلمة ومستحيل أكمل واستغرب على اللي يدرسون بالليل وبالفيور!





الكلمات اللي قلتها ما حسيتها داثرة!

اخاف تقصدني!

:p



هذا البوست برعاية انديرال (حبوب تهدي وتخفف من القلق)

:p

ZooZ "3grbgr" يقول...

مممممم

فركيته؟؟

:")

حلم جميل بوطن أفضل يقول...

هذا وسواس مو رهاب

بو محمد يقول...

سبحان الله

أنا مثلك بالضبط بالنسبة للمواعيد بس مو ساعتين عاد :-)، و لكن أحرص على التواجد قبل الموعد المحدد، و عشقي للمعلقات، الشعر عموما، هذي وراثة صراحة :-)

من تقصد بالشياب؟؟ يانغ عدل؟؟

:-)

دمت و الأهل و الأحبة برعاية الله

غير معرف يقول...

انا عندي رهاب عدم اتمام الأشياء
عندي مشكلة مع اخر صفحه ...
قلبي مايطاوعني ادرسها

اما مسألة المواعيد ..
أنا نفسك بس هون حييييييييل
اكون من ال4 قاعده و6.30 اطلع

انا اطلع من بيتنا قبل المحاضرةبساعتين عشان لاتحوشني زحمة مدتها 10دقايق
هذا شي اسوأ من الرهاب عندي ادوس 160 ولا اوقف بالزحمة

Safeed يقول...

إذا عندي موعد الساعة 1 ، و وصلت الساعة 1.01 أكسنل الموعد و أمشي !

الموعد شي مقدس ... عشان جذي أنا مثلك أعاني من رهاب المواعيد :(

أما رهاب الأشياء عندي فسببه إن عقلي ساعات يشتغل أسرع من ايدي ، لذلك أتفاجئ (بالكتابة مثلا) إني فكرت بجملة و صغتها براسي و لكن ساعة الكتابة طوفت نصها لاعتقادي بإني انتهيت من كتابتها!

هالحالة وايد وايد وايد تتكرر معاي و مسويتلي مشاكل !!

..

ماعون صارت قديمة ؟

الظاهر يبيلي
update !

:)

وردة فرح يقول...

مممممم ،،
أنا كنت أعاني من هوس الوقت ،،

بس مب قبل بساعتين عاد ،،
يعني نص ساعة لين ساعة ،،

لكن ألحين أول عالدقيقة بالضبط ،،
غيرناها هالعادة ،،

:)

دمت بود ،،

Sn3a يقول...

انا لازم اكون بالجامعه قبل المحاضره بساعه واذا امتحان ساعه ونص
يعني الوضع عادي بالنسبه لي مو غلط
الغلط ان الواحد يوصل بوقت الامتحان لان صوت الباب ينرفزني واهو يتبطل ويتسكر


وشعور الانجاز عجيييب
من زمان ماحسيت فيه من تخرجت
اصلا قمه الوناسه عندي اني اكتشف غلطه بكلام الدكتور او اني القى معلومه كنت ادورها باسبوع


خاشوقه تذكرني بيدي الله يرحمه
وين خاشوقه الزلاطه


يسلموو عالبوست

bakah يقول...

معمعه .. حياك الله .. :)

هذا طبع ورثته من شايبنا , والطبع يغلب التطبع .. :)

ايام الجامعة انا بعد كنت احاول اتفادى محاضرات الصبح , لكن التخصص المحترم كان يجبرنا اننا ناخذ هالوقت كل كورس لأن الشعب قليلة ..!

دمت بخير .. :)

bakah يقول...

جاندل .. حياج الله اختي .. :)

انا بالكويت ما اروح للمطار مبجر , لكن بره الكويت اذا ما اكون بالمطار قبلها بأربع ساعات انجن ..!!

مرة كنت بميونخ , رحت قبل الطياره بست ساعات , رفيجي كرهني بسبب هالسفره .. :)

الدراسة هذي فن .. :)

احلى وقت للدراسة ايام المدرسة هو بعد صلاة المغرب إلى الساعه 12 بالليل ..

اما ايام الجامعة , كان احلى وقت للدراسة هو الفجر , نروح انا وربعي نقعد بمقهى الكوت بالمطار ندخن شيشه وندرس , الشيشه تخليني عبقري .. :)

طبعا عبقري يعني اييب سي بالماده مو اكثر .. :)
..
بالنسبة للكلمات .. :)

لا ما اقصدكم .. :)

bakah يقول...

زووز .. حياكم الله .. :)

الفركيته ما عمري سمعت احد يقولها , اتوقع انقرضت نهائيا .. :)

bakah يقول...

الحلم الجميل .. حياك الله .. :)

ممكن يكون وسواس .. بصراحة ما اعرف الفرق بينهم ..!!

bakah يقول...

بومحمد .. حياك الله :) ..

المعلقات عشق ايام الطفولة .. بداية تعرفي على الشعر كانت بالمعلقات ..!

لا مو يانغ . . :)

دمت بخير ..

bakah يقول...

سفيد .. حياك الله .. :)

ما شاء الله .. يبيلك تسوي عيار حق مخك , علشان يشتغل بسرعه اقل من ايدك .. :)

مشكلتي بالمواعيد تخليني اتهاوش مع ربعي احيانا .. :)

خصوصا لما نتواعد بمكان واكون انا اول الواصلين , والباقي يوصلون بعدي بساعتين .. :)

دمت بخير ..

bakah يقول...

إنسانة .. حياكم الله اختي .. :)

والله انا بودي اغيره .. :)

لكن دائما احسب حساب الظروف المصاحبه , خصوصا خوفي من ان تتعطل السيارة او ان اقع في زحمة مرورية ..!

شاكر مروركم ودمتم بخير .. :)

bakah يقول...

سنعه .. حياكم الله .. :)

الإنجاز بعد التعب جدا ممتع ..

احيانا انجز الكثير من الأعمال بالدوام بدون تعب , ما احتاج اسوي شي سوى اني اتصل بأشخاص معينين واهم يخلصون العمل .. لكن ما احس بمتعة الإنجاز .. !

اتوقع اكثر تعب ممكن يمر على الإنسان هو بالدراسة .. وبعدها كل شيء سهالات :)

دمتم بخير وتمنياتي لكم بالتوفيق في بحثكم عن الوظيفة .. :)

bakah يقول...

4 .. حياكم الله ..

اسمحلي مريت على التعليق وطوفته ..

آخر صفحه زين هههههههههههه ..

انا لازم اخلي جابتر كامل على القليل .. :)

افضل الخروج من البيت مبكرا على السرعه ..

دمتم بخير ..

انا مسلم بسيط لي الحق بإيذاء الآخرين يقول...

من تكون أنت؟ . . من تكون أنت لتتدخل في شؤون غيرك؟

___________________________


أنا مسلم لي الحق بالتدخل بشؤن الجميع حالي حال بقية المسلمون

1- الله أعطاني الحق أن أتجسس على الناس لأفضحهم بشرط أن آتي بأربع شهود .


2- الله أعطاني الحق أن أفضح الناس وأقوم بالتشهير فيهم على الملأ حتى يكونوا عبرة لغيرهم !


3- الله أعطاني الحق أن أتدخل في شؤون غيري وأراقب أخلاقهم وإن لم تعجبني لأنها ليست من الفيم الاسلامية أعطاني الله الحق في إيذائهم بل سوف يكافئني إن قمت بإيذائهم والتكلم عنهم بالسوء وسوف تكتب حسنة لي !


فلا إله الله محمد رسول الله !

فريج سعود يقول...

انا اكون فاضي قبل المشوار بساعتين واقول تو الناس تو الناس لي اخر خمس دقايق اطلع طاير متأخر

معاناة

المعلقة مو جنهم ريتد 18 ؟

bakah يقول...

انا مسلم .. حياك الله ..

شكرا لك على هذا التعقيب ..

دمت بخير ..

bakah يقول...

حياك الله بوسعود .. :)

انا هالمشكلة اواجهها بالدوام , دايما متأخر , اما بالمواعيد المهمة ما اقدر , لازم اطلع بكير :)

المعلقات اوفر ريتد .. :)

esTeKaNa يقول...

اخي العزيز
استكانة تطالب فريج الهيلق بتعويض
:)
صار لي ساعه من بوست الى بوست
لك اسلوب مميز وعفوي في طرح افكارك
وتنوع نادر وجميل
الله يحفظك ويبارك في فكرك ويسعدك بكل شئ يا رب
:))

bakah يقول...

استكانة .. :)

حياك الله اختي .. :)

الي تامرين فيه حاضرين ..

شاكر لطفكم وهذا من طيب منبعكم ..