الأحد، 17 مايو 2009

فازن خوات شمه :) ..

خلصت الإنتخابات , وفازن خوات شمه :) , وعليهن بالعافيه المجلس , وانا اقول والله لو الخرافي والسعدون يرحمون العالم , ويخلون الرياسه حق معصومه المبارك , ترى اريح لنا , لأن الحكومة كما يبدو ما تبي الخرافي , لكنها لا تستطيع ان تعيش مع السعدون رئيسا , فلو يتنازل الأثنين ويفكونا , نرتاح من اعادة الإنتخابات كل يومين , ولو وافقوا انا سأطلق حملة أسميها :
نبيها أربعه .. سنين مو اشهر .. :)
عاد تخيلوا معصومه تصير رئيسة المجلس ..! , شتسوي بالي طلعوها من الوزاره هههههههههه ..
تخليهم طول فترة المجلس بدون ميكروفون .. :)

..

النتائج مخيبة للآمال في الرابعه , رقم البراك صعب , والخليفه بعد حيي ودع , اظن كله بسبب تحالفات قبايل الشمال , الي يشوف مسجات الطنايا وعيال وايل البارحه بتلفزيون الوطن , يقول ان عنزه وشمر قاسمين الدايره على اربعه اربعه , ويلعبون على الصوتين الباقيات :) , احلى مسج قريته يقول :
عنزه تعلن الدحه بعد صدور النتائج الرسمية .. :)
يالله , الحين دحوا وادبكوا بعد , نجح عسكر الوحيد الي ما دخل الفرعية .. :) !!
هلا هلابك يا هلا ... لا يا حليفي يا ولد
هذا انا دحيت معكم , علشان ما تقولون يتطنز علينا .. :)
هذا الموقع به قصة الدحه لمن يحب يعرفها ..
http://www.hrb-kw.net/vb/showthread.php?t=9041
اكثر ما تحسفت عليه هو سقوط ذكرى الرشيدي , ليتها طالعه بمكان وجه بن فهره ( ماني قايل اسمه لا يزعلون علينا الربع ههههههههههههه ) ..

..

بالدوائر الأخرى اكثر من حزنت على خسارته هو النيباري , هذا اثبت لي بالدليل القاطع ان الصقر لم يكن يحظى بإقتناع الناس بفكره , والا أي شخص يصوت للصقر اقتناعا , حتما يصوت للنيباري , اصلا الي يعطي الصقر صوت من اربعه , يعطي النيباري عور ..!

..

الدائرة الأولى صدمة , تشتت اصوات القوائم الشيعية , فأنتجت سبع اعضاء , ولو ان اهل القوائم التزموا بتصويتهم , اظن الشيعه ما كانوا يتعدون خمسة اعضاء بالأولى ..!
عموما نقول مبروك للحساوية , ما بغيتوا تطلعون عضو .. :)
والدويسان سواها وصار عضو بُعيد الفاصل هههههههههههههههههههههه ..
اتوقع داود حسين يسوي برنامج بشهر رمضان المبارك القادم عن الدويسان بالمجلس :) , خوش برنامج راح يكون .. :)

..

الخامسه سواها سعدون وسقط واحد من العجمان , تحالف سعدون حماد هو التحالف الوحيد الناجح , بل انه تفوق على بعض الفرعيات .

..

اعضاء البلدي كلهم طلعوا بوش , الخرافي انسحب , والبغلي مسكين ما ادري منو قص عليه وقاله انزل , انت بروحك ناجح بإنتخابات البلدي بالتكميلي !! , وماجد موسى نكبوه حمران النواظر .. :)

..

الحين نقول لأعضاء مجلس الأمة اننا اصبحنا في حل منكم , سواء بالتشليخ او بالتقريع او كلاهما معا :) , ونتمنى ان لا نحتاج لأن ننتقد احدا , وتتحقق آمال الجميع بتنمية طال إنتظارها ..!

..

متى اول جلسة ؟ عندكم خبر ؟ وشنو راح يصير بقانون الإستقرار ؟ هل راح يصوتون عليه الحين والا بعد فترة ؟

..

هذا وتقبلوا اعتذاري على القطاعه , لكن حالتي حاليا مثل حالة الواحد لما يبي يكح وبنفس الوقت يبي يعطس , مشتهي ومستحي , متعشي ويبي ينقش ... إلى آخره .. :)
دمتم بخير ..

هناك 25 تعليقًا:

ma6goog يقول...

خوش بوست , ملخص جميل و مفيد

C'est La Vie يقول...

صراحة فاجأتنا نتايج هالانتخابات
عسى الله يكتب اللي فيه الخير والصالح لهلبلد ويكفنا شر كل من فيه شر انشالله
بالنسبة لمواعيد الجلسات اعتقد يحطونها بموقع المجلس الرسمي

Yin مدام يقول...

بوست حلو

الدائرة الأولى لوية
غلب فيها التصويت العاطفي

معصومة إكتسااااااح :))

ومبروك للـ4
بس مهمتهم بتكون صعبة وعساهم على القوة

وذكرى فازت سياسيا وإنجازها كبير في هالدائرة



بس كأن كلمة الحكومة أقوى من كلمة الشعب بهالإنتخابات؟؟


ويلكم باك
:))

chandal/danchal!! يقول...

ويلكم باك



اسم البوست يذكرني ببياعة بسوق الحريم

:p


يعطيك العافية

:)

ANGEL HEART يقول...

ولكم ممعذور الدنيا تلاهي

خوش تحليل شامل ومختصر اي والله حسافه على ذكرى بس سوت انجاز كبير يعتبر فوز :)

والبركه باللي فازوا ان شاءالله

مَـــــعْــــمَــــعَـــــه يقول...

تحليل رائع ويحليله الدويسان صار عضو مجلس أمه الله يالدنيا ( بعيد الفاصل )

نبي رئاسة المجلس للعم السعدون فقط لا غير

حاطب ليل يقول...

احلا مسج قريته ماذكر على اي قناه الظاهر سكوب
"متوكلون وملتزمون..ماتولوون"
البراك وحش
عسكر مررعب
الاصطاف اللي معاه محترررف
ذكرى تعلمت اللعبه
وولكم بااك

Safeed يقول...

يستاهل بومحمد (الدويسان) .. قبل الإنتخابات بجم يوم سألته تامرنا على شي قال (دعاؤكم) .. حتى ما طلب صوتي مع إني مو بالأولى :) ..

بس يستاهل فكر و أدب و ثقافة و شخصية..

أما الدائرة الأولى ككل فهذي سالفتها سالفة ، أنا ناطر نتايج الفرز الرسمية عشان نبدي ننبش بخفايا "الأحداث" اللي صارت

...

4 حـريـم ،
ما اتوقع احد يه على باله هالعدد حتى المرشحين اللي سألتهم بالغالب اتفقوا على وحدة او ثنتين بالكثير لكن 4 ، اعتقد خدمتهم ظروف هالانتخابات.

...

الناس زهقوا من معظم اصحاب التنظيرات الفارغة معظم اللي استطاعوا فك قيدهم من الإلتزام القبلي و العاطفي صوتوا لوجوه جديدة بينما ظلت القبائل (خصوصا الرشايدة و العوازم) ملتزمين بمخرجات الفرعية التزام مو طبيعي

و منا للشيخ المعتوق و صالح الموسى عشان يعلمون تيارهم معنى الالتزام :)

...

ما سموه (الحوت) بالخامسة على الفاضي !

بو محمد يقول...

الصراحة

أول شي، بوستك حسيت و أنا أقراه بنفس الإحساس الذي كنت أحسه عندما أشرب قلاص لبن بـــــــــــــارد الساعة ثنتين و نص الظهر بالصيف بالكويت، تحس فيه و هو يسرسح

شافي و وافي

بس شفتهن و هن يقفطن العالم
شي قومه و خط و شي منهم خط

مواتر ناعمه بس تعطيك طال عمرك

:-)

دمت و الأهل و الأحبة برعاية الله

Yang يقول...

انا خلاص قاطعت السياسة, وبروح ابيع بنك عند الدوار.


خلاص يا زين من حبكم عزلنا.



تحياتي

Yang يقول...

تعال صج


ولكم باك :)


لا تقطع وايد عن التدوين, ترى يصير فيك حساسية بعدين :)

مطعم باكه يقول...

مطقوق حياك الله ..
شكرا لك .. :)

مطعم باكه يقول...

C'est La Vie ..
حياك الله اختي ..
اللهم آمين , والله الكويت تستاهل , والمصيبة ان الكل متفق على التنمية , لكن يقف بطريقنا شوية اشياء سخيفة ..!!
دمتم بخير .. :)

مطعم باكه يقول...

مدام ين .. حياكم الله اختي ..
شكرا لكم ..
مهمتهم ستكون صعبة جدا , خصوصا مع وجود المتصيدين , وانا اولهم :)
نتمنى لهم التوفيق ..
اما ذكرى , اظن انها لن تتكرر بالدائرة مرة اخرى .. :)
دمتم بخير ..

مطعم باكه يقول...

جاندل .. حياكم الله اختي ..
شكرا لكم .. :)
أي .. عندنا خوش دراعات .. :)

مطعم باكه يقول...

حياكم الله اختي آنجل هيرت ..
شكرا لكم .. :)
اظن ان ما انجزته ذكرى سيكون أقرب رقم تحققه أي امرأه بالرابعه خلال السنين الطويلة القادمة ..!
دمتم بخير ..

مطعم باكه يقول...

حياك الله اخوي معمعه .. :)
والله انا مو قادر اصدق الدويسان عضو .. :)
بس حسب كلام الشباب يقولون مو هين , انا ما اشوف فيه أي عبقرية , لكني ما اعرفه لهذا ما اقدر احكم ..!!
ويا اخي ودنا السعدون رئيس , لكن الحكومة مستحيل تسمح بهالشي , لهذا لابد من بديل ..!

مطعم باكه يقول...

حاطب ليل .. يالله حيه .. :)
شكرا لك ..
حلوه .. :)
عسكر سمعت عنه اشاعات كثيره , الله يستر لا تكون صج .. :)

مطعم باكه يقول...

حياك الله عزيزي سفيد .. :)
والله انا ما اعرف الرجال , لكن انا عاجبتني سالفة بعيد الفاصل , فمعلق عليها :)
يبيلها تحليل نتائج الأولى , تهقى سيد عدنان ما ينزل المره اليايه ..؟ :)
بالنسبة للحريم , الوحيده الي اعتقد انها حققت اختراق قوي , هي الجسار .. اما البقية فكانوا في دائرة الترشيحات ..
الرشايده والعوازم ما ينلامون , والقبائل بشكل عام ما ينلامون , واجد شباب اعرفهم يقولون لو الحكومة توقف قبول الواسطات ما نسوي فرعية ولا نشارك فيها , لكن الحكومة تحدنا على هالشي , لأن اذا ما عندك عضو بالكويت فسوف تعامل معاملة ولد السيلانية ..!! :)
الحوت وراه رزم أد كده .. متلتله على ألبه :)
لو تحط زوري بمكانه هم يصير حوت .. :)

مطعم باكه يقول...

يا هلا بومحمد .. أرحب يا رجال .. :)
شكرا جزيلا على لطفكم الجم عزيزي .. :)
عز الله شخطوا لبعض الناس .. :)
دمت بخير عزيزي بومحمد انت وعائلتكم الكريمة وجميع من يعز عليك ..

مطعم باكه يقول...

يانغ .. حياك الله عزيزي .. :)
معزل مبجر الله يهديك .. :)
والله ما وراها الا عوار القلب , انا قبل كنت خبل اقرأ خمس جرايد باليوم ههههههههههههه , سمعان ان الناشط السياسي يقرأ جرايد وايد ههههههههههههه , الحين اقرأ صفحة الفنون بس :)
تصدق صارت فيني حساسية .. قريب راح اعزل انا بعد , خبرك نفس هبات الجات والمسنجر والمنتديات والبالتوك , كل شي له وقت وينتهي .. :)

Yang يقول...

اسمحلي يا اخ مستر صديق فريج :)

سفيد:

الدائرة الاولى اللي لعب فيها 2.

1- حكومة
2- عواطف

والالتزام كان موجود عند البعض والبعض الآخر صعب التحكم فيه, لأنهم ليسوا بدمى مثل ما قال فلان, كل واحد عنده عقل يحكمه مو مرجعيات تحكمه بالانتخابات. وبالنسبة لقواعد التحالف ترى ان طقت 3000 إلى 3500 صوت, والباقي قناعات شخصية, وعلى فكرة ترى أكثر من نصف القاعدة تشتتت أصواتها.

والاهم من ذلك, الكل يصب لمصلحة الكويت مو مصالح خارجية وعلى حسب قناعاته الشخصية.


الموضوع طويل وله وايد تشعبات.

الله يبارك للفائزين ويوفقهم لخدمة الوطن وليس المرجعيات مكا يزعم فلان.


ولا تسألني منو فلان يا فريج, ادري فيك :))))))

Safeed يقول...
أزال المؤلف هذا التعليق.
Safeed يقول...

مطعم باكه

راح ينزل :) .. لأن الصف الثاني انتهى دون اثر و حاليا قاعد تصير شبه محاولة اعداد لصف جديد (د. الصفار ) :)

اعتقد التحالف بعد هالانتخابات بحاجة لاعادة ترتيب اوراقه و تنظيم صفوفه و توسيع مشروعه ( اللي اقصى فيه عدة وجوه بارزة بحسابات خاطئة!).. و بعدها لكل حادث حديث :)

مطعم باكه يقول...

يانغ , سفيد .. حياكم الله .. :)
نقاش مفيد .. :)
نحتاج النتائج التفصيلية وراح نعرف شنو صار .. :)