الجمعة، 10 أبريل 2009

زهيريات .. أول مرة .. !

فن الزهيريات فن جميل وله مكانة عزيزه على قلبي , لكني بحياتي كلها لم احاول ان امارسه , لكن في جلسة انس في احدى المقاهي , اتحفنا احد الأصدقاء ببعض الزهيريات , فثارت قريحتي , وكتبت هذه المحاولات الأولى .. :)
اتمنى ان تحظى بإعجابكم , مع العلم ان القصص خيالية , فلا تأخذكم الظنون , ما عدى الأخيرة فهي محصلة حوار بين صديقين عن احوال البورصه كتبتها انا شعرا ..
..
مريت في حيكم عاني انا جاركم
قلبي نزل بيتكم وجسمي نزل جاركم
زعلان قلبي رجع يشكيلي من جوركم
...... يا حيف هذا الوفا كيف انقطع حبله
...... عاقر احلامي طلعت وانا احسب انها حبله
...... ما عاد فيني صبر وصوتي انقطع حبله
ملعون قلبي إن عشق بنت اولدت في حيكم
..
عادت ظنوني سوا مع خيبتي وحسره
امها تبيها بشغل والبنت متحسره
لو هي ولادة خلصت حتى ولو متعسره
..... دزتلي ذاك المسج من بعده طاب الخاطر
...... موعدنا بكرا الصبح لكن عليك تخاطر
...... دقيت صدري جذب : من يومي آنا حاضر
نمت وقعدت الظهر وطنشت هالجيكره ..!
..
يابو حمد قوعت كل اسهمي ونامت
قامت عصاعص تشتغل والروس كلها نامت
ماتت احلامي وذوت هم زين انا ما مت !
...... يابو علي قلعتك لانك تدور الساهل
...... والي يتحرشله بأسد عضاته يستاهل
...... تاجر عرف لعبته وانتا بها جاهل
والحين قامت روسهم وهذي العصاعص نامت !

هناك 25 تعليقًا:

غير معرف يقول...

زهيريات يعني شنو؟

مشكلة خريجيين الإنجلش سكول!

Yin مدام يقول...

والله ولك مستقبل في الزهيريات ..
كلهم حلوين ..
بس آخر زهيرية إعجبتني وايد :)

لا توقف :)

إكتب لنا وحدة عن رداة التعليم يرحم لي والديك وأسويلها ديزاين وأعلقها بمدونتنا
:))

Yang يقول...

هذا التعليق مع أذان الفجر, فإذا في بدليات عادي طوف :)


شنو موضوعك؟؟؟؟


اي اي صح.

خوووووووووووووش (قاعد احك راسي لحظة)


قبل الأخيرة شكلك مسويها ها؟؟

اعترف ....

بس صج والله خوش, لاتوقف, منها للأعلى طال عمرك :)

بالتوفيق, ولاتنام وايد وتكشت بالأوادم :)

بو محمد يقول...

عدل يا يبه
تصف زهيري طلعت هااا
:-)
صدقني لو تقرى عن هذا اللون من الشعر و تقوم تحفظ منه راح تلقى عمرك اشوي اشوي تكتب شي موزون
أتفق مع ين بأن الأخيرة الأضبط و الأجمل
و محاولات قوية لتكون أول محاولات صراحة، بس يبيلهم اشوية تعديل و يصيرون موزونين عدل

و إذا تبي معلومات عن الزهيري فأخوك مولع به و حافظ منه و وارثه بعد
:-)

خذ الرابط هذا قد يفيد

http://al7athrah.blogspot.com/2008
/01/blog-post_30.html

دمت و الأهل و الأحبة برعاية الله

سيدة التنبيب يقول...

حلوين ..

شكلك لك مستقبل فعلا :)

غير معرف يقول...

رديت قريت الموضوع مرة ثانية...

بس... سيدي... شنو الفرق بين الشعر... والزهيرية؟

Mohammad Al-Yousifi يقول...

عضاته يستاهل


هذي عن الطاحوس مو البورصة

MakintoshQ8 يقول...

ملعون قلبي إن عشق بنت اولدت في حيكم

عجبني هالبيت :)

استمر والله يوفقك

Safeed يقول...

أنا بكتفي بكلمة أحسنت ..
خبرك أنا مو مال زهيريات و لا شعر :)

لكن أشوف فيها "ريحة الأبوذيات" ، صح؟

bakah يقول...

دكتور بلو .. يالله حي عيال المدرسة العنقريزيه :)
زهيريات هاي عبارة عن شي اصفر ويركض على البحر :)

bakah يقول...

الفاضلة ين .. حياكم الله ..
رداة التعليم ..!! :)
خلينا ساكتين احسن .. المشكلة ان ابوي كان طول حياته يبيني اصير مدرس عربي , حسباله للحين المدرسين شي محترم بالكويت , ما درى ان الوزارة نزلت بالمدرسين إلى الحضيض ..!
دمتم بخير ..

bakah يقول...

يانغ .. حياك الله .. :)
يمعود لو مسويها جان محدن درى ومحدن سمع .. :)
مو اكتبها زهيريه :)
وشكرا لإطرائكم , ترى اصدق ههههههههههههههههههههه

bakah يقول...

العزيز بومحمد ..
أي والله اول مره اكتب زهيري , وحتى البوذيه ما عمري جربتها :)
بس كتبت دارمي وايد , ايام الشقاوة ههههههههههههه ..
تسلم على اللنك , كان فعلا مفيد وابياتكم جدا رائعة عزيزي ..
دمت بخير وسلام ..

bakah يقول...

سيدة التنبيب .. حياكم الله ..
حلت دنياكم اختي .. شكرا :)

bakah يقول...

دكتور بلو .. :)
هذا السؤال احيله على مدير الإستخبارات يجاوبك عليه :)
مسكين الشويعي بهالمقطع تعلق ههههههههههههه

Yang يقول...

مطعم, تكفه لاتصدق, ترى أتغشمر :))))
أخاف باكر اتنزل ديوان شعر :)




لا, بس الزهيرية الأخيرة حلوة
صج صج مو غشمرة :)


بالتوفيق

bakah يقول...

ابا سلمى .. حياك الله .. :)
عز الله يستاهل .. لكن ما عليك هذا يطلع منها سهالات :)

bakah يقول...

ماكنتوش .. حياكم الله اختي ..
شكرا لمروركم .. :)

bakah يقول...

حياك الله سفيد .. :)
أي الأبوذيات نوع من انواعها حسبما يذكر بومحمد في بوسته الي حط لنكه بالتعليق :) ..
ماكو احد يروح حسينيات ويقول انا مالي بالشعر .. :)

bakah يقول...

يانغ .. حياك الله .. :)
لوووووووووووووووووووووول ..
كسره محترمه ههههههههههههههههه
يمعود هم زين وحده عجبتك :)

حرف يقول...

كأس الهنا والمنى مابيننا داري تمنيت انا جاركم وبحيكم داري


مقطع من أبوذية قام بغناءها محمد القبنجي

المفردات قريبة من الزهيرية الأولى اللي كتبتها :)

توارد خواطر جميل

ومدونة أجمل

bakah يقول...

اخي الفاضل حرف .. حياك الله .. :)
هذا المعنى متكرر وبكثرة في الشعر العربي عموما , والشعر الشعبي العراقي خصوصا ..
شكرا لمروركم عزيزي .. شرفتونا :)

Sn3a يقول...

كنت مندمجه
من قريت كلمه جيكره كسرت المود ومت ضحك
صح لسانك
وتجربه جميله جدا

bakah يقول...
أزال المؤلف هذا التعليق.
bakah يقول...

حياكم الله اختي سنعة .. :)

صح بدنكم .. :)