الجمعة، 3 أبريل 2009

حجاب المصاصة .. وحمارة القايله ..!

مساكم الله بالخير .. :)
يا جماعة انا عندي ملاحظة لأخواتي النساء خصوصا الفتيات الصغيرات , واتمنى انها تفيد ولو جزء من الفتيات لأن القضية مو هينه وانا بصراحة قلبي عليهم :) ..
القضية هي مطمطة الفتيات لوجوههن :) ..
مطمطة = المط او الشد او ما ادري شنو الي يسوونه بالضبط ..
لكن يا جماعة والله شفت واجد بنات ماكو بوجهها ملامح , وصماخها سلطعوني , وشي يرثى له والله , هل في شي يحطونه بالحجاب بحيث يشد الوجه ؟ لأن مو طبيعي الوضع ..
عموما انا السالفه مزعجتني وقلت اقولها , لأن والله حرام بنات صغار , مبين من الجسم انها جاهل , والا الصماخ الله يستر تقول كرة قدم امريكيه , حرام جذي تخرب وجهها على صغر , المكياج والشغلات الثانية تأثر على البشرة , وبعد هم سالفة الملابس يا جماعة , ترى والله مو حلو وحده جسمها متروس شويه واترصرص بجينز ياله داش فيها ..!!
..
هذا اولا .. :)
اما ثانيا , فهو حجاب غريب شفته قبل كم يوم لما كنت بالجامعة كان عندي شغل , وهو حجاب اطلقت عليه حجاب ابو مصاصه , ههههههههههههه , والله كل ما اذكر هالبنيه اضحك وادعي الله انه يشافيها كانها مهي بصاحيه , واذا صاحيه انا المجنون ..!!
جايبه سترتج , بنطلونها مال الرياضه , مادري دلاغ الوالده , ولابسته فوق راسها وصاير راسها جنه المصاصه الي مغلفه بنايلون احمر , علبو موضه ..!!
والله هالموضه هي الي مضيعتكم يالحريم ..!!
والمشكلة على غير سنع ..!!
والا اكو وحده تلبس تنوره وتحتها السروال السترتش المرصرص , وتروح للدوام ..!!
لكن العالم ما تعرف شنو تلبس ووين تلبسه , والهبات ذابحتكم , والمشكلة غالي مو رخيص , لأن لو رخيص ما تشترونه ..!
..
الأمطار هذه السنة , ذكرتني بأعصار سبيجه العام :) , تذكرونه ؟ , فترة الإعصار كانت بدايات تعرفي على المدونات , وكانت التغطيات رائعة جدا :) , الله يستر لا تنعاد هالسنة , رغم انها متوقعة , وهي جزء من تغير مناخي عالمي اصبح واقعا في السنين الأخيرة ..!
حتى ان بعض المتفائلين يقول ان مناخنا الصحراوي سوف يتحول الى مناخ معتدل كثير الأمطار في فترة خياليه لا تزيد على الخمسين سنة القادمة , يعني عادي رايح للجهراء تلاقي سرب غزلان شاخط جدامك :) ..!!
يسويها البخت ..؟ .. اظن قويه شويه :)
..
عندي خوش مشروع فني , وهو عمل فلم رعب كويتي , تعتمد قصته على اسطورة حمارة القايله الكويتية , طبعا الفكرة انقدحت في رأسي وانا اقرأ بوست الأخت الكريمة جاندل دانشل حول الأشياء الي كانت تخاف منها واهي صغيره , لهذا لها نصيب من الأرباح :) ..
المقدمة :
تخيل سائق تاكسي كويتي , على شفر قديم , بمنتصف الصيف الحارق , في فترة الثمانينات, يمشي على راحته على شارع الفحيحيل , ويشوف من بعيد سواده تأشر له , يقترب منها , واذا بها سيدة ترتدي برقع , وعيناها تلمعان , يخفف السرعه , لكنه يتوقف امامها , تأتي إليه ببطىء , وهي تعرج في مشيتها , ينزل النافذه ليسألها إلى أين , لكنه يفاجئ بحافر حمار يدخل عليه من النافذه , وتهب نسمات هواء خفيفه فيطير البرقع واذا بوجه حماره وبعدين كت يا مصور :) ..
هذي المقدمة , ونبي منكم القصة والمخرج والممثلين والفلوس وانا حاضر بالباقي ههههههههههههههه ..
..
بالمناسبة , انا سمعت من الأحد الأصدقاء ان شبان اثنين – الحين شياب – كانوا يلعبون على سواق التاكسي في فترة الثمانينات , على شارع الفحيحيل خصوصا , حيث كانوا يقومون بأخذ حوافر الذبايح , ويمسكونها , ويدخلون ايدهم بالكم , ليبدو للرائي من مسافة بعيده , ان ايديهم حوافر , وكانوا يوقفون على هالشارع ولما يمرهم سايق تاكسي يأشرون له ولما يقرب يمدون عليه الحافر , فكان يحسبهم حمارة القايله ..!!
ويقول انهم قزروها على هالحال فترة طويلة , لين الله هداهم , ولا ادري مدى صحة هذه الرواية :) .. لكنها تصلح كخاتمة للفلم , شتبون بعد عطيتكم المقدمة والخاتمة , انتم بس عطوني الميزانية وانا اضبطكم :) ..
..
من اكثر الأشياء التي تعيدني طفلا حين مشاهدتها , هي المقدمات الغنائية للمسلسلات الكرتونية القديمة :)
مقدمة غريندايزر قويه , وعدنان ولينا بعد , صج اني ما اداني عدنان , لكن علشان خاطر عبسي اتابع المسلسل هههههههههههههههه , وهم مقدمة السنافر حلوة – علشان لا يزعل سنفور سفيد علينا هههههه - ..
لكن اكثر اغنية طربية , هي اغنية شاركي وجورج , حده مزاج الي مألفها .. :)
واكثر اغنية احبها هي اغنية كبامارو بالطبع .. :)
هذا الرابط للي ما يطلع له الفيديو :
http://www.youtube.com/watch?v=hDmYprSKceA&feature=related

هناك 20 تعليقًا:

Safeed يقول...

من راقب الناس مات همًا :) أو غما .. لا فرق ..

عاد الله وكيلك البارحة شفت منظر خلاني اضحك غصبا علي ، رغم إني مو من هواة الخز و لا احب مجابل الناس (برئ :)) لكن هالمنظر جذبني بغرابته!

لابسة حجاب ، و بنطرون إلى تحت الركبة بسنتميتر واحد بس! و ما دونه إلى الحذاء - اكرمك الله - مكشوف!

استغفر الله ، لكن لا شعوريا تأملت هذا التناقض الصارخ ما بين الرأس المغطى بالكامل و ما بين المكشوف !

هل هي موضة و لا هبة و لا مع الخيل يا شقرا ما ادري!

و ما عشت اراك الدهر عجبا ..

....

اعصار سبيجة هذا سبب فيني جرح غائر بإيدي :) .. اثره للحين موجود ، شلون انساه :) ؟

احنا حاليا نمر في فترة مناخ ( كثير الغبار ) ..

مناخ ( كثير الامطار) للحين مبجر .. و شكله على ما يوصل دوره ، بتكون نص الكويت مدفونة تحت الرمال :)

....

فيلم رعب ؟
بلغ السيناريو للمسلّم .. و تشوفه بمسرحية بعيد الفطر الياي :)

...

تدري عاد ..

أفضل رسوم متحركة عندي هي "نيلز" و "سندباد" ، كنت املك اشرطة كل الحلقات ..

اما هالنينجا بو النودلز فكان غرام اخوي الكبير ، و من المحظور عليّ المس اي شريط من اشرطته إلا بوجوده .. بينما اشرطتي كانت محل لعبث السلطات الحاكمة :)

يعني الفيديو مالك رجعني لذكريات العهد الديكتاتوري السحيق :)


و هذي هدية لك :) :

http://www.youtube.com/watch?v=MPGNgUlPWHI

chandal/danchal!! يقول...

لوووووووووووول

راعي النصيفة سالم

:)))

شرايك تصير حمارة القايلة اهي سايق التاكسي! وتحسر بالعبرية! وتكون حزتها بالقوايل!... جنها تخرع أكثر!

وطريج فحيحيل بدون شي يخرع! اتحاشاه قد ما أقدر!... سبحان الله جني حاسة بحمارة القايلة!
.
.
.
وحجابات المصاصة والكوشاية يبيلهم لجنة ازاله التعديات!
.
.
.
يا حلو زمن الكارتون باللغة العربية... عل الأقل نطلع منه بفايدة... بس على زمانا كنت احب الليث الأبيض و سنان


تتمسى بالخير

:)

غير معرف يقول...

الفلم فطسني من الضحك ...


وعجبني انه شفر

بالبداية قلت وانيت احمر قديم

لوووووووووووووووووووووووووووووووول

why me يقول...

نو هالحجاب بعد!!


لاحول ولا قوة الابالله.. اخرتها حفر وحجاب لوول



وبعدين انا دايما اقول المدونين فيهم ابداع مدفون


وكاا انت ابداعك بدأ ينمو ويكبر ويصير فلم حمارة القايله لوووووول


;pp



خوش فكره



لي عزمت قولي اكتب السيناريو انا الحين طايحت له تجارب بأبله أمل

;pp




احلو الكارتون انا احب كبمارووو



نينجا نينجا ترم ترم تا تا


;p





ي واحب بعد وادي الامان


هذي اهداء لك .. اسمعها

:)


http://www.youtube.com/watch?v=3SPT1wKfG-k

بو محمد يقول...

أحيانا يكون التأثر بالأوساط المحيطة مدعاة لتصرفات لا تفسير لها
-----
فلمك خوش فلم
و القصة صح اشتهرت بالثمانينات و أنا كنت متابعها بالجرايد و الكل كان يسولف فيها

و أنا حاضر و بالشوفه لمساعدتك في على الفلم، مستعد أمثل دور حمارة القايلة
:-)
-----
التغيرات المناخية أتمنى من الله سبحانه و تعالى أن يمنحني العمر و إياكم و سائر المسلمين كي نشهدها إن حدثت
-----
و أغاني البباي ماكو على سندباد
:-)


بس سياق الكلام في البوست و طريقة العرض الصراحة عجيبة، كنت اتبسم طول ما أنا أقرا

الله يونسك بلحظاتك إن شاء الله

دمت و الأهل و الأحبة برعاية الله

Yin مدام يقول...

الله يستر علينا وعلى بناتنا وعلى بنات الناس..

بس ياما جرائم ترتكب بحق نظرنا وسمعنا وحرياتنا وديننا بإسم الحرية والموضة والعادات الغربية المكتسبة والتشبه بهم

الله يعينا !!!

يانغ وولدنا العود صاروا ما يرضون يروحون معاي أي مجمع أو سوق :(
قمت وريحت نفسي وأروح الصبح ولا القايلة
لا هلاقة ولا مغازل ولا زحمة :))

.........

لوووول
سرب غزلان بالجهراء !! الله يسمع منك ونشوف التغيير المناخي... بس ذيج الساع الكويتيين يتسيحون ويسافرون بحثا عن البراري والصحار والحر واللهيب :))))

.........

عاد شكثر أحب أفلام الرعب بس ماكو فيلم رعب محترم
أنت شوف ناس تمول وتخرج وتكتب وتنتج لك فيلمك ... وأنا مستعدة أشتري تذاكر وأشوف :))

.........

الرسوم المتحركة القديمة رائعة وفيها عبر وقصة والله العايلة بكبرها كانت تجابل التلفزيون لين إشتغل "سنان" ولا "بيل وسيباستيان" و"ريمي"

أحلى أغنية لمقدمة "سندباد" بس غيروها الحين صارت مو شي ...

خوش بوست .. ممتع
يعطيك العافية
:))

غير معرف يقول...

ماني متكلم عن ستايل بناتنا... لإن الضرب بالميت حرام...
بس سالفة الستريتش تحت التنورة... سالفة!

عالعموم، قبل سنتين تقريبا، وعقب ما شفت فيلم رعب ياباني مع واحد من الشباب الألمان... دشينا بنقاش شلون حتى الأفلام المرعبة، واللي البعض يعتبرها تافهه، ممكن تعكس واقع وحضارة ومخاوف الشعوب

فأفلام الرعب الأمريكية غالب ما يطغى عليها طابع القتلة المتسلسلين، والمرضى النفسيين والعقليين واتوقع هالشي ناتج من أرتفاع نسبة هالنوع من الجرايم عندهم
وعندك بعد افلام "نهاية العالم" بأشكالها... واللي تعكس التدين أو التطرف الديني عند بعض الأمريكيين مقارنة مع الأوروبيين، خاصة بعد تجربة هجمات سبتمبر

بينما افلام الرعب اليابانية تلقاها تطرق للمشاكل المتعلقة بالتطور التكنولوجي... عندك إنترنت قاتل في فيلم، وفي فيلم ثاني التليفون النقال القاتل... و في فيلم عن كاميرا قاتلة... صراحة شي مضحك!

سألني الألماني عن سبب قلة الإنتاج العربي للأفلام عامة، والرعب منها بشكل خاص... خاصة مع ثراء الحضارة العربية والإسلامية بهالنوع من القصص
فعندنا الجن والعفاريت والطنطل وام السعف والليف وحمارة القايلة والملبوس ... الخ

صراحة... معاه حق!

بس إنت الله يهداك ما تنفع مخرج... شاللي حاطلنا نهاية الفيلم قبل لا تنتجه!؟

bakah يقول...

حياك الله عزيزي سفيد ..
أي والله مات هما .. :)
يا اخي هذي ضغوط اجتماعية مؤسفه ..!!
تصور ان رغبة كثير شباب للزواج الآن هي التالي :
محجبة , لكن ما تلبس عباية ..!
فتلاقيها المسكينه تبي تتزوج , فتسوي كل شي علشان هالزوج الموعود ..!
..
عسى ما يسبب لك آلام دائمة ..؟
تصور عندي صديق لبناني مجروح قبل خمس سنوات تقريبا , كلما تمر ذكرى الجرح يبدأ جرحه يؤلمه :) ..!
والله كريم , مو بعيده عن الله يصيرون اهل لندن يصيفون عندنا :) ..
..
المسلم ما اداني تمثيله .. بعدين نبي بنات حلوين بالفلم علشان الإثارة , المسلم حده انتصار الشراح :)
..
نيلز وسندباد ..!! :)
شوف , انا لما كنت ياهل كنت ما اطوف , حتى ماروكو اتابعها ههههههههههههههه ..
بس الي اموت عليه كان نينجا , والمشكلة انه ما كان عندنا فيديو بالبيت , فكنت اروح بيت اخوي واقردن عيال اخوي , تكفون يالربع ترى يمدحون نينجا , واهم مالهم خلقي , فتعال قنع فيهم مني لما يعطفون علي ويشغلون لي نينجا :) ..
فأحمد ربك ان على القليل عندك فيديو واشرطه ههههههههههههههه ..
وشكرا على الهديه .. :)

bakah يقول...

اختي الكريمة جاندل دانشل .. حياك الله .. :)
لا عاد مو النصيفه .. قلنا نسبة من الأرباح .. 10% مثلا :)
..
خوش فكرة , هم نوفر بالممثلين , ماله داعي سايق تاكسي , حمارة القايله اهي السايق ..! جميل :)
..
الكوشايه ما وصلنا هذا للحين الظاهر ..!
انا اصلا ما اعرف شنو كوشايه ههههههههههههه ..
..
أي الليث الأبيض بعد اغنيته حيل حلوة , كنت اتشقق لما اشوفه , خصوصا لما ينام بمردان الأسد الأصفر الشرير .. :)
وانتم من اهل الخير اختي ..

bakah يقول...

حجر كريم .. حياكم الله .. :)
لا .. الجزء الثاني ان شاء الله يكون وانيت احمر قديم , وتنتقل حمارة القايله لحفر الباطن بعد ما يكتشفونها اهل الكويت ويطاردونها .. :)
حرقت علينا الجزء الثاني الله يهديك .. :)
تشرفنا بمروركم ..

bakah يقول...

حياكم الله اختي واي مي .. :)
شنسوي , هم البنات بعضهم مساكين ماخذين الحجاب على غير اقتناع , مجرد عرف اجتماعي ..
ان شاء الله لا حصلنا الميزانية للفلم تكتبين انتي السيناريو , ونعطيج دور بنت راعي التاكسي .. :)
وادي الأمان مسلسل عبيط , كان يعقدني فوق ما انا معقد بأيام طفولتي البائسة :) ..
شكرا لمروركم اختي ..

bakah يقول...

حياك الله بومحمد .. :)
الإنسان لما يكون ضعيف شخصية يسوي كل شي علشان يرضي العالم ويبقى خاسرا لإن ارضاء الناس غاية لا تدرك ..!
غير متحجبة بإقتناع عندي خير من محجبة بدون ان تقدر قيمة حجابها ..!
..
محشوم يا بو محمد , حمارة القايله شروى عدوينك , اما انت شرواك الطيب يا الغالي ..
..
التغيرات المناخية ليست كلها سعيدة للأسف , يقال ان دول كاملة سوف تغوص تحت الماء , منها اجزاء كبيرة من الكويت ..!
..
كلكم تحبونه سندباد .. هذا واهو عراقي بعد .. لو لبناني ؟ جان العموم حاط صورته ههههههههههههه
..
دمت مبتسما هانئ البال اخي . .

bakah يقول...

حياك الله اختي الكريمة ين ..
والله السوق ما ينبغى هالأيام ..
شي يضيق الخلق والله , ضوضاء بصرية ..!
واشكال غريبة عجيبة ..!
وزين تسوين تتسوقين الصبح , ولو اني اشك ان السوق يفضى بالكويت ..!!
..
تخيلي ..!
كويتي رايح صحراء الربع الخالي شهر 6 سياحة ..!! :)
الله يسمع منج ..!
..
لا يمعوده التذاكر ببلاش , العرض الأول للمدونين , بس كل واحد اييب اكله معاه :)
..
صحيح , سابقا كان حتى الكبار يتابعون الكارتون ..
وبيني وبينكم ترى للآن يوجد اشخاص مولعين بالمسلسلات الكارتونية اليابانية الجديدة ..!
واحد من الربع يوميا ساعتين على القليل يشاهد هذه المسلسلات ..!!
دمتم بخير اختي ..

bakah يقول...

دكتور بلو .. حياك الله عزيزي ..
يا اخي احنا بالكويت ما عندنا قواعد او اتيكيت صارم للملابس ..!
واحد من الشباب يداوم بملابس رياضة ..!!
وشغله مو بالفيلد , لا اوفس وورك ..!!!!
شي يفشل والله ..
..
حسب ما سمعت من واحد من الربع ان اكو افلام رعب مصرية ..
ويقول ان واحد منها كانت قصته عبقرية , لكن بسبب الميزانية صار الفلم مصخره :) ..!
والله اعلم ..!
مشكلة افلام الرعب انها تعتمد على التكنلوجيا بشكل كبير , يعني المؤثرات الصوتية والستيديوهات والمكياج يلعب دور كبير فيها , وانت تعرف وضع السينما العربية ..!!
شدراني يمعود , هذا اول فلم لي .. :)
هذا ودمت بخير يا حضرة الدكتور .. :)

why me يقول...

ليش ليش ليش تعطيني دور بنت صاحب التاكسي


ابي البطوله .. لوول


وبعدين الحين وادي الامان معقد !!




عيل انتوا


جراندايزر
وجونقار
وجومارور
وكبمارو


لوول


من اسمه حلو وهادي وادي الامان
;pp

Sn3a يقول...

اييي تصدق انا جذيه استغرب منهم
انا تحجبت يعتبر متأخر فللحيني نظامي مال اول شيله والفها على امطه لا برنجلز ولا كره قدم فوق راسي


بس هالبنات ياخي عندج جيلي ليش تلبسين ضيج
والله فشله قبل مايكون عيب وحرام قبل مايكون فشله


وانا بعد احب عبسي واكره عدنان لما يتكلم

maha يقول...

صارلي فترة من أشوف صورتك مع التعليقات أحاول أتذكر اسم فتى النينجا

أخيرا كبمارو
مو إلي يحب أكل الشومن


بعدين حجاب هالوقت من كثر ما ضحكنا على أبلاتنا المصريات إبتلينا
بس عاد إحنا بالمبالغة محد يقايشنا
الحمد الله الذ عافانا مما ابتلاهم به

بعد أخاف تالي تحوشني العدوه


حمارة القايلة من يصير الإفتتاح بلغوني عشان عيالي

بس تدري أخاف يتعقدون تدري عيال
هالوقت ما تقولهم روح وراك

مجموعة مواضيع في موضوع واحد حلوه الخلطه

bakah يقول...

حياك الله اختي الكريمة واي مي .. :)
يمعوده البطولة هو دور حمارة القايلة ..!!
وانتي محشومة عن هالدور اختي .. :)
..
وادي الأمان اشكالهم كانت معقدتني :)

bakah يقول...

حياك الله اختي الكريمة سنعة .. :)
الله يهديهم ..!!
وعبسي حبيب الشعب , شخصيته حيل عاجبتني :)

bakah يقول...

حياك الله اختي الكريمة مها .. :)
لا ان شاء الله ما تحوشكم .. :)
لأن اصلا شكله مو حلو , فما اظن تصير موضة ..!
..
أي والله جهال هالأيام مساكين .. :)
حساسين وعندهم مشاعر :) , مو مثلنا حنا قبل هههههههههه ..