الثلاثاء، 3 نوفمبر 2009

وداعا ..

.

.

تلدك أمك , خائفا , او مختنقا كما يقول صديقي ابو الفهاميه ! , المهم انك تبكي ..



تكبر ..



تكبر ..



تكبر ..



وبين هذه الكلمات الثلاث هناك تفاصيل كثيرة لا أهمية لها ..

مثل تخرجك من الروضة - المرحلة الوحيدة التي تفوقت فيها :) - ..

او تخرجك من الثانوية ..

دخول الجامعة وإختيار التخصص ..!!

كلها كانت قرارات بديهية بالنسبة لي .. وكنت أضحك من أحد أصدقائي لتردده الكبير في مسألة تحديد التخصص !!

اختيار الوظيفة كان قدر ومكتوب .. :)

تستطيعون القول ان الوظيفة هي من إختارتني .. والحمد لله ..

كل هذا سهالات ..

لكن لأول مرة .. اتحت لصديقي - الخبل المذكور اعلاه- فرصة الضحك علي ..

عندما رآني فزعا مترددا لأول مرة بحياتي..!
.
.
الزمان : أربعة أسابيع سابقة من اليوم ..
المكان : مستشفى السلام الدولي في بنيد القار ..
الحالة : إشتباه الإصابة بإنفلونزا الخنازير ..
الأعراض : خنازير صغيره تركض فوق راسي .. وأنا معصب ومصخن ..
النتيجة : آخذ مغذي بالوريد لأول مرة بحياتي .. وأبره .. وكمادات للحرارة .. وبعد ثلاث ساعات قمت أركض مثل الحصان .. وطحت له تشوت بالخنازير .. :)
.
.
كان موعدنا يوم إصابتي بإنفلونزا الخنازير .. فأجلته يوم واحد ..

دخلت .. عيوني حمر .. لحيتي مش مرتبه .. عقالي مايل - بالوراثه - ..!

قلت أشياء وايد .. لكن اللي أذكره هالعباره :
ترى أنا عصبي ..!
عصبي مو يعني مجنون أقتل الناس ..
لا .. عصبي يعني مرات أعصب على شغلات سخيفه ..!! بعدين قمت أضحك بشكل مرعب ههههههه
.
.
الزمان : قبل كم يوم ..
المكان : المحكمه ..
الشخصيات : قاضي معصب - ما ادري شسالفته - , والشهود , وأنا وهي وأمها ووالدها وجدها ..!
الحدث : ملكه - ملجه - .. كتب كتاب .. سمه ما شئت ..
النتيجة : أنا خرجت من عصبة الصعاليك العالمية , وتنازلت عن لقب كونت دوXXXX الـXXXX , وحصلت على لقب جديد , متزوج تحت الخدمه الإجباريه ..!
.
.
نتقبل التهاني .. أو العزاء .. أو الشماته .. كلن حسب فهمه لهذا الحدث العظيم في حياتي المتواضعه :)
.
.
ملاحظات للتاريخ - اخاف المدام تقرأ البلوق بعدين وتفهم غلط - :
1-ترى انا مستانس .. :)
2- ترى الزواج خوش شغله .. وأنا أنصح أخواني العزاب بالزواج .. :)
3- البوستات القادمه ستكون خاضعه لرقابة أم العيال .. والبوستات السابقة ستخضع للتنقيح الرقابي .. :)
4- وداعا بالعنوان اقصد فيها وداعا للصعلكه والأمجاد ..
.
.
وعقبال كلمن يبي يتزوج .. واللي ما يبي يتزوج هم عقباله - عناد :) - ..

هناك 35 تعليقًا:

Safeed يقول...

كان في واحد مرة كتب ببوست من بوستاته: لا للزواج :) .. تعرفه؟

رغم إنك بهالخطوة المفاجيئة قطعت آخر رابط مشترك بيني وبينك :) هههههه إلا أن هذا ما يمنع فرحتي الحقيقية لك ..

ألف مبروك، وبالرفاه و البنين، والله يجمع بينكم على خير ويرزقكم الذرية الصالحة بحق محمد وآله الطاهرين عليهم السلام.

ومنك المال ومنها العيال إن شاء الله، وعقبال ما تشوت العصبية بعيد ..

:)

chandal/danchal!! يقول...

ألف ألف مبروك

بارك الله لكما وبارك عليكما وجمع بينكما في خير

:)


عصبي وعقال مايل!

:p

دمعة المقهور يقول...

الف مبروك انشاء الله

الله يرزقكم الذرية الصالحة

ويسخركم حق بعض اللهم آمين

ترا الزواج حلو اسأل مجرب

ليش العقال مايل

:)

مطعم باكه يقول...

سفيد .. حياك الله :)

ذكرتني جزاك الله خير .. الحين بحذف هالبوست ههههههههههههههه

ماكو قطيعه ان شاء الله .. انا راح اكون عزوبي يومي الجمعه والسبت , علشان احتفظ بعضويتي بالهيئة العامة للصعاليك .. :)

الله يبارك بحياتك عزيزي ..

وعقبالك ان شاء الله :)

مطعم باكه يقول...

جاندل .. حياك الله :)

الله يبارك فيكم أختي .. وعقبال ما تفرحين بعيالج وتشوفينهم معاريس - مو عاجلا عشان ما تزعلين :) - ..

ما ادري ايهما السبب وايهما النتيجة .. العقال المايل سبب العصبية ام العصبية سبب العقال المايل ..! :)

مطعم باكه يقول...

دمعة المقهور .. حياك الله :)


الله يبارك فيكم اختي .. :)

ان شاء الله يكون حلو علينا احنا بعد :)

العقال مايل لأسباب مجهولة بالنسبة لي .. سبحان الله اعدله بالبيت , ولما اركب بالسيارة يميل شوي شوي , وما اوصل المكان اللي بروح له الا والعقال ساعتها يكون مايل على الآخر :)

المقوع الشرقي يقول...

اللهم لا تؤاخذنا بما فعل السفهاء منا يا رب العالمين

الله يسامح اللي اتجوزو أبلي واللي تجوزو بعدي

اللي أبلي ما ألوليشششششششش

واللي بعدي ما سألونششششششيش
:))














دا أتشااقا:))
ألف ألف مبروووووك
الله يهنيكم ..ويسعدكم يارب
وزييين ما سووويت
باركلها بالنيابة عنا..يابو عقال الميالي
منك المال..ومنها العيال

مطعم باكه يقول...

المقوع الشرقي .. حياك الله :)

شفتي شلون .. :)

عاد لو سائلكم تنصحون بالزواج ؟ :)
.
.
الله يبارك فيكم اختي .. :)

حلم جميل بوطن أفضل يقول...

مبروك

مطعم باكه يقول...

الحلم الجميل .. حياك الله :)

الله يبارك فيك اخوي .. :)

غير معرف يقول...

مبروك جدا جدا :)
زين ما اخترت - مع اني ما اعرفها بس هالعبارة تقال دائما في مثل هذه المناسبات- :)
منك المال و منها العيال :)

الزين يقول...

يه يه يه

عقبال البكاري

وتييب مطاعم باكه صغيرونات



:)

الا عندي سؤال

ليش حالات الزواج الإنتحارية تكثر على دخول الشتا

تهقا في رابط بينها وبين الوسم

!!

مطعم باكه يقول...

ورق مخطط .. حياك الله :)

شكرا لكم اختي :)

الله يبارك فيكم ويوفقكم يا رب :)

مطعم باكه يقول...

الزين .. حياك الله :)

الله يبارك بحياتكم اختي :)

مطاعم باكه صغيرونات .. نسويها فرانشايز ونفتح افرع في كل دول العالم .. :)

ما ادري والله ..!

يمكن لأن العزوبيه يعيشون في صقيع من الحرمان العاطفي , ولما ايي الشتا يتكالب الشتاءان , شتاء العاطفة وشتاء الأجواء , على قلب العزوبي المسكين , فيضطر يتخلى عن احلامه الورديه بحياة الإستقلالية الدائمة , ويتزوج ..! :)

Deema يقول...

يه يه يه
عسـاه مبارك و سعيد

الله يوفقكم و ييسّر أمورك مثل ما يسرها في تخرجك من الروضة :)

مطعم باكه يقول...

ديمه .. حياك الله :)

الله يبارك فيكم ويوفقكم اختي .. :)

اي والله .. لو كل شي سهالات مثل الروضه , جان الدنيا حيل حلوة :)

Anonymous Farmer يقول...

You say

ترى الزواج خوش شغله

Followed by

اخاف المدام


It doesn't get less convincing than that, LoL. Funny post though

ريانة العود يقول...

الف الف الف الف مبرووووك

والله فرحت لك ..
عسى الله يوفقك ويتمم عليك ويجمع بينكم بالخير والمودة ..

والله يرزقك بالذرية الصالحه ..

مبروووووووووووووووووووك

مطعم باكه يقول...

Anonymous Farmer حياك الله :)

القضية مو اقناع بقدر ما هي تملص قانوني من تبعات اي كلمة هنا او هناك :)

مطعم باكه يقول...

ريانة العود .. حياك الله :)

شكرا جزيلا . . أخجلتونا اختي :)

الله يبارك فيكم ويوفقكم ان شاء الله :)

أبوغرايم يقول...

ههههههه

مادام العقال مايل

شي بديهي

أن تكون مسقط رأسك حايل (:

و عالبركه إنشالله - موفق خيييير

بس خل هالمدونه و إسمع كلامي (: راح يجيك يوم تكون هالمدونه ملاذ لك عند الهروب من حنة المدام و إزعاجها (:

و للعلم ,, أنا من أعداء الزواج حتى شدقت و الاهل أفقدوا الامل من ورااي بمسألة الزواج (:

شعاري بالحياة (:

عيشتنا عيشه هنيه
مادام إحنا عزوبيه

(:

غير معرف يقول...

:(

مَـــــعْــــمَــــعَـــــه يقول...

الحمدلله عالسلامه ومبروك الزواج بس شلون رضوا فيك وانت متخنزر .

نصيحه سو حق المدام مدونه ثانية تمويه وخلها تنشغل فيها ... وخلك حمشششششش

استذئبوا قبل أن تأكلكم الذئاب يقول...

مبروك

Sweet Revenge يقول...

مبروووووووووووووووك منك المال ومنها العيال
بس ماني عارفه اقدمت علي هذه الخطة بعد قرائة بوست عثماني ولاقبل
بوست "حبيبي الرجل"
بس ماعليك منه الزواج حلو
الزواج زين
اخاف بعد ام العيال تقرا

esTeKaNa يقول...

والله العظيم والله
ومن القلب فرحت
وكيف لا افرح لأخوي العزيز؟
الف الف الف مبروك
اللهم بارك لهما وعليهما واجمع بينهما بالخير
اللهم جمله في عينيها بما تحبه وترضاه
وجملها في عينه بما تحبه وترضاه
وألف بين قلوبهم واسعدهم لتكون هي قرة عين لك وتكون انت قرة عين لها

:)

غير معرف يقول...

هل أنت مصاب بأنفلونزا الخنازير؟

فريج سعود يقول...

عظم الله اجرك

بنشوف متى بوستات التحلطم ع الزواج

تهقى راح تكسر الرقم القياسي

Sn3a يقول...

اول شي ماتشوف شر وسلامااات

والف الف مبروك
ربي يباركلكم ويسخركم لبعض ويبعد عنكم شر حاسد اذا حسد
ويرزقكم الذريه الصالحه بصحه وعافيه


ترا بتلقى جبهه معارضه بالردود
تحثك على الاستسلام وتييبلك طاري طلبات البيت والجمعيه والقروض
وبتلقى ردود شوكيه تقولك مردك تكتب انك متحسف

مالك شغل فيهم;p
الله يهنيكم ان شاءالله

مطعم باكه يقول...

حياكم الله جميعا .. :)

شكرا لكل من هنأ .. وأعتذر لتأخري بالرد لإنشغالاتي الكثيرة هذه الأيام :)

دمتم بخير اعزائي ..

Salah يقول...

الف مبروك

منك المال والعيال :)

الوتيــــــــــن يقول...

تصدق .. صارلي فترة أشوف العنوان من عناوين المدونات ومابي أدش .. خفت لا تكون صح ودعت التدوين ومابي يضيق خلقي

بس أشوه طلعت السالفة دخول المؤبد الوردي؟ لا ان شالله السالفة مي جايده لول

مبروك ان شالله وعقبال ما تسولفلنا عن أذية اليهال ههيهي

ZooZ "3grbgr" يقول...

انا ويني عن هالبوست!!!!!

كولولووووووش

الف الف مبروك

منك المال ومنها العيال

الله يكتبلكم كل خير وذرية صالحه وعيشه هنيه بما يرضيه ياااارب

خاف الله فيها وانشاالله بتحطك بعيونها

وأدري اخيي الغالي ما يتوصى

على فكره قولها زووز تباركلج وتحبج

أمانه

بس قولها زووز

ماله داعي اسم البلوق هااا خخخخ

خلها تاخذ علي اول عشان لا تنصدم

وربي فرحتلكم

:")

فــــــرنـــــــاس يقول...

كل عام وأنت ومن تحب بخير

فرناس

حاطب ليل يقول...

عيدك مباارك وكل عام وانت بخيير